
Ermənistanın cənubunda Zəngəzur dəhlizinin açılması perspektivi Rusiya sərhədçilərinin İranla sərhəddəki gələcək fəaliyyəti məsələsini yenidən gündəmə gətirib.
Nyus.Az xəbər verir ki, sərhəd təhlükəsizliyi üzrə ekspert Lev Azatxanyan bildirib ki, yeni nəqliyyat infrastrukturunun yaradılması Ermənistanın dövlət sərhədlərinin mühafizəsini mərhələli şəkildə öz üzərinə götürməsi prosesini sürətləndirə bilər.
Ekspertin sözlərinə görə, Zəngəzur dəhlizinin fəaliyyəti ilə bağlı suveren nəzarət, təhlükəsizlik və gömrük məsələləri Ermənistanın səlahiyyətində qalacaq.
Bu istiqamətdə proses artıq başlayıb. 2025-ci ilin əvvəlindən Ermənistan sərhədçiləri İran istiqamətindəki sərhəd-keçid məntəqələrinə müstəqil nəzarət edirlər.
Ermənistanın baş naziri Nikol Paşinyan Rusiya sərhəd bölmələrinin ölkənin dövlət sərhədlərindən mərhələli şəkildə çıxarılmasını və mühafizənin tamamilə erməni sərhədçilərinə həvalə olunmasını nəzərdə tutan planlardan danışıb.
Məsələ ABŞ, Rusiya, İran, Türkiyə və Azərbaycanın regiondakı maraqları ilə də birbaşa əlaqəlidir. Bu ölkələrin Zəngəzur dəhlizinin fəaliyyəti və sərhəd təhlükəsizliyi ilə bağlı yanaşmaları fərqlənir.
Lev Azatxanyanın fikrincə, Ermənistan üçün əsas məsələlər sərhəd zonasının fasiləsiz mühafizəsini təmin etmək, texniki və hərbi hazırlığı gücləndirmək, İranın etimadını qorumaq və yeni nəqliyyat infrastrukturunun fəaliyyətini təşkil etməkdir.
Ekspert hesab edir ki, Zəngəzur dəhlizi ilə bağlı işlərin sürətlənməsi Araz boyunca Rusiya sərhədçilərinin rolunun azalmasına səbəb olacaq. (Musavat.com)
Nyus.Az

























