Uzun müddətdir ki, Zaqatala rayon 17 nömrəli yol istismarı idarəsinin rəisi Mövlud Qəhrəmanovun müxtəlif təyinatlar üzrə ayrılmış büdcə vəsaitlərini ələ keçirməsi və bunun qarşılığında özü üçün neçə-neçə obyektlər inşa etdirməsi və s. haqda məlumatlar, əksər media qurumlarının gündəmini zəbt edən mövzulardan birinə çevrilib. Adicə bir faktı vurğulayaq ki, adı çəkilən bu şəxsin adı ölkəmizin şimal rayonlarından olan Zaqatalada, məhz daşıdığı vəzifəsinə görə deyil, daha çox oliqarx-məmur olması səbəbindən dillər əzbəri olub. Məsələnin maraqlı və düşündürücü tərəfi ondan ibarətdir ki, Saleh Məmmədov Avtomobil Yolları Dövlət Agentliyinə rəhbərlik etdiyi vaxtdan bugünə kimi, Mövlud Qəhrəmanovun iş fəaliyyətinin lazımınca araşdırılmadığı söylənilir. Bu da ortaya çoxsaylı sualların çıxmasına səbəb olmaqdadır. Buna baxmayaraq o da hər kəsə bəllidir ki, Saleh Məmmədov adı çəkilən bu quruma rəhbər təyin olunduqdan sonra, respublikamızın yol infrasturukturunda əsaslı islahat proqramları həyata keçirildi, çoxsaylı uğurlara imza atıldı. Yəni, atılan addımların hər biri hər kəsin gözləri önündədir. Bəzi sakinlərin söylədiklərinə görə, Avtomobil Yolları Dövlət Agentliyi rəhbərinin Prezidentin mühafizə idarəsinin rəisi, general Bəylər Əyyubova bağlı şəxs olduğundan, Mövlud Qəhrəmanov özünü sanki “toxunulmaz vəzifə sahibi” hesab edir. Belə bir halın varlığı da bu şəxsə geniş “əl-qol açmağa” imkanlar yaradır. Ayrı-ayrı şəxslərin iddialarına görə 17 nömrəli yol istismarı idarəsinin rəisi, idarəçiliyini həyata keçirərkən elə bir incə metod və üsullardan istifadə edir ki, bu da son anda onun maddi maraqlarının təmin olunması ilə nəticələnir. Belə bir səbəblər üzündəndir ki, hazırda Mövlud Qəhrəmanovun “Qəbələ” restoranı, adını tam dəqiqləşdirə bilmədiyimiz başqa bir şadlıq sarayı, neçə-neçə daşınan və daşınmaz əmlakları var. Yəni, bu şəxs sahib olduğu əmlaklarının dəyərinə görə, heç də sıradan bir şəxs deyil.
Bir halın varlığını da qeyd edək ki, Mövlud Qəhrəmanovun həm büdcə vəsaitlərini “tarmar etməkdə”, həm də onun iş üslubu haqda KİV nümayəndələrinə məlumatlar çatdıran kənar şəxslərin ünvanına təhqiramiz ifadələr işlətməkdə də mahirdir. Məsələn, elə ki, adı çəkilən vəzifə sahibinə bu və ya digər məsələlərlə bağlı suallar verirsən, o halda o, “çox qələt edib yazıblar, başlarını da daşa döyüblər” deməkdən də çəkinmir. Baxmayaraq ki, Azərbaycan Respublikası Konstitusiyasının 12-ci maddəsinin 1-ci bəndində hər bir şəxsin hüquq və azadlığı ilə xüsusi hallar qeyd olunub. Yəni, hər bir şəxsin şərəf və ləyaqəti qanunla qorunur. Belə bir ifadələrin işlədilməsi vəzifə sahibi olan bir şəxsə yaraşmasa da, nədənsə Mövlud Qəhrəmanov bu cür “qəhrəmanlığından da” geri qalmır. O, mənimsəmə faktları və digər olaylarla bağlı ünvanlanan suallara “əlli il rəhbər vəzifələr daşımışam, mənim niyə testoranlarım, icarəyə verdiyim kafelərim və digər əmlaklarım olmasın” deyə cavab verir. Bəli, bu cür cavabları eşitdikcə belə bir qənaətə gəlirik ki, aylıq əmək haqqı təqribən 450-500 manat civarında olan Mövlud Qəhrəmanov, bu gün rayonun ən imkanlı oliqarx-məmurlarındandır. Bəzi media qurumlarının açıqlamalarına görə, təkcə 2018-ci ildə Zaqatala şəhərinə asfalt örtüyü vurulması üçün büdcədən 11.000.000 (on bir milion) manat vəsait ayrılsa da, son anda həmin məbləğin təyinatı üzrə xərclənmədiyi iddia olunur. Söylənilənlərə görə, Mövlud Qəhrəmanov daha çox maxinasiyarı, məhz rayona bitişik kənd yollarının təmiri və yaxud da yeni yol çəkilişləri zamanı həyata keçirtdirir. Yəni, bu ad altında böyük məbləğdə vəsaitlər silinir. Hətta, o da iddia olunur ki, kəndarası yollara asfalt örtüyü vurulan zaman sakinlərdən hansı yol istismarı idarəsinin əməkdaşlarına “görüm-baxım edirsə”, o halda həmin sakinin “bəxti gül açır”. Belə ki, həmin sakin atdığı addımının qarşılığında büdcə vəsaiti hesabına əldə olunmuş asfaltı həyət-baxcasına da döşətdirə bilir. Hərçənd, belə maxinasiyalar haqda məlumatlı olan Mövlud Qəhrəmanov, hər zaman ona “uğur gətirən” işçisinin qarşısında “yaşıl işıq” yandırır.
P.S. Hörmətli çoxsaylı oxucular! Yaxın günlərdə Zaqatala rayon 17 nömrəli yol istismarı idarəsinin rəisi Mövlud Qəhrəmanovun “yanacaq əməliyyatları”ndan, rəhbərlik etdiyi qurumdakı “ölü canlar”ın varlığından və digər maxinasiyalarından bəhs etməyə çalışacağıq. Odur ki, bizi izləməyi unutmayın.
Nyus.Az
