Xəbər verdiyimiz kimi 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə terror hücumu olub. Hücum edən şəxs avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar.
Hadisə baş verəndən İran tərəfi müxtəlif aldadıcı variantlar səsləndirməyə başladı. Gah Azərbaycan səfirliyinə hücum edənin yanında uşaqlarının olduğunu, gah hadisənin ailə-məişət zəmnində baş verdiyi kimi cəfəng iddalar səsləndirildi. Hücum anının görüntüləri yayıldıqdan sonra isə İran tərəfinin bütün iddialarının yalan olduğu məlum oldu.
Bu hadisədən sonra onsuz da xaosun içərisində batan İran daha da çalxalanmağa başladı. Dünəndən etibarən İranın terror siyasətinə cavab olaraq ayrı-ayrı qruplar tərəfindən ölkənin müxtəlif vilayətlərində hücumlar həyata keçirildi.
Həmçinin, aylardır, İranın bütün şəhər və kəndlərində davam edən etiraz aksiyaları daha da şiddətlənib və bəzi yerlərdə hətta iğtişaşlar halını alıb. Molla rejimindən, onun siyasətindən və yanlış idarəçiliyindən cana doyan əhali həbs olunmasına, edam edilməsinə baxmayaraq, mübarizələrini davam etdirirlər.
Əlbəttə, bir çox beynəlxalq təşkilatlar, dövlətlər və qurumlar haqlı olaraq Azərbaycan səfirliyinə qarşı tətbiq edilən bu terror əməlini şiddətlə pislədi və bunda birbaşa olaraq mövcud İran hakimiyyəti qınanıldı. Artıq heç bir bəhanə İran rejimini bu məsuliyyətdən yayındıra bilməz.
Beləliklə, hazırda İranda hökm sürən qeyri-ictimai-siyasi sabitlik özünün ən pik həddinə çatıb. Bu vəziyyət molla rejiminin çöküşünü hər gün daha da yaxınlşadırır.
Azərbaycan səfirliyinə xain hücumla bağlı Trend-ə açıqlama verən Milli Məclisin deputatı Sevinc Hüseynova qeyd edib ki, İrandakı Azərbaycan səfəriliyinə edilən terror hücumuna görə məsuliyyət bilavasitə İranın üzərinə düşür. Azərbaycan cəmiyyəti bu hadisəni qəti şəkildə pisləyir və hesab edirəm ki, İranın ali rəhbərliyi Azərbaycan xalqından üzr istəməlidir.
"Vyana Konvensiyasının müddəaları kobud şəkildə pozulub. Hadisə ciddi şəkildə araşdırılmalı və cinayətkar, onun arxasında dayananlar öz cəzasını almalıdır. Azərbaycan dövləti məsələnin obyektiv araşdırılmasını gözləyir. Lakin buna ümid çox azdır. Belə ki, İran həmişə terror dəstək verən bir ölkə kimi tanınır. İranda səfirliklərə, diplomatik nümayəndəliklərə, həmçinin xarici vətəndaşlara qarşı hücumların olması ilə bağlı çoxsaylı faktlar mövcuddur. Ona görə də səfirliyimizə qarşı törədilən terror hadisəsinin obyektiv araşdırılmasına böyük şübhələr var. Yayılan məlmatlardan da görünür ki, hadisəni törədən Yasin Hüseynzadə İran vətəndaşıdır və o, İranın xüsusi xidmət orqanları, xüsusilə də SEPAH-la əlaqəli olan bir şəxsdir. Əgər səfirliyin öz mühafizəsi terrorçunun qarşısını almasaydı, bütün səfirlik əməkdaşları qətlə yetirilə bilərdi. Yayılan videogörüntülərdən də görünür ki, İran polisi terror hücumun qarşısını almaq üçün heç bir cəhd göstərməyib və hazırda da hər hansı bir operativ addımların atılması müşahidə olunmur.
İran tərəfi hadisənin məsuliyyətini üzərindən atmaq üçün hadisənin mahiyyətini təhrif etməyə çalışır. Guya ki, bu hadisə məişət zəminində baş verib. İran tərəfi terrorçunun həmin əraziyə uşaqla gəlməsi və s. kimi yalan məlumatlar yayır. Bütün bunlar yalandır və İran xüsusi xidmət orqanları ilə bağlı olan terrorçunun hədəfdən yayındırılması məqsədi güdür. Cinayətkar mütləq öz cəzasını almalıdır", - deyə o əlavə edib.
Milli Məclisin deputatı Cavid Osmanov isə bildirib ki, İranda heç bir səfirliyin, diplomatik nümayəndəliyin, eyni zamanda, Azərbaycan səfirliyinin toxunulmazlığına heç bir zəmanət yoxdur.
"Çünki indiki hakimiyyət terror hadisələrini törədənlərin, terror təşkilatı yaradanların arxasında duran qüvvələrdir. İranda indiyə qədər bir çox səfirliklərə, diplomatik nümayəndəliklərə, xarici vətəndaşlara qarşı terror hadisələri törədilib. Azərbaycan səfirliyində də törədilən bu terror hadisəsi cəmiyyətimizi çox ciddi narahat edir. Azərbaycan tərəfi İran tərəfindən bu terror hadisəsini obyektiv araşdırmağı gözləyir, ancaq buna da ümid yoxdur. İranın Azərbaycana qarşı qərəzli mövqe nümayiş etdirməsi, əsassız ittihamlar səsləndirməsi, Azərbaycanla münasibətləri gərginləşdirməsi fonunda bunlar heç də ümidverici deyil", - deyə deputat əlavə edib.
C.Osmanov vurğulayıb ki, hadisəni törədən şəxs Yasin Hüseynzadə İran vətəndaşıdır. "Əlbəttə ki, birmənalı qeyd etmək olar ki, onun İranın xüsusi xidmət orqanları ilə, xüsusilə də SEPAH-la əlaqəli olduğuna dair çox böyük şübhələr var.
Səfirliyimizin mühafizəçisi terrorun qarşısını almasaydı, terrorçu səfirliyin bütün əməkdaşlarını qətlə yetirəcəkdi.
İsrailin Azərbaycandakı keçmiş səfiri Artur Lenk öz tvitter hesabında etdiyi paylaşımında vurğulayıb ki, İsrail Azərbaycanın İrandakı diplomatik missiyasına hücumu kəskin şəkildə qınayır.
"Necə dəhşətlidir. Azərbaycanın Xarici İşlər Nazirliyinə dərin hüznlə başsağlığı verirəm. Kimsə bunun niyə İranda baş verdiyinə təəccübləndi?", - deyə o qeyd edib.
Nəticə etibarı ilə İranda Azərbaycan səfirliyinə edilən xain hücum birbaşa İran rejiminin günahıdır və bəlkə də öz təşkilatçılığı ilə baş tutub. Bu terror molla rejiminin Azərbaycan dövlətinə və xalqına bəslədiyi düşmənçilik siyasətindən qaynaqlanır. İran daim terrora dəstək verən ölkə kimi tanınıb, burada tarixən terrorçular üçün münbit şərait olub. Belə olduğu halda rəsmi Tehran diplomatik korpusların, xarici nümayəndəliklərin təhlükəsizliyinə necə zəmanət verə bilər? Digər tərəfdən İranın ölkəmizə qarşı tutduğu düşmənçilik mövqeyi sirr deyil. Xüsusilə də son iki ildə İran tərəfinin təhdidləri, bizimlə açıq hədə dili ilə danışması məlumdur. Bütün bunlar onu deməyə əsas verir ki, bu gün Azərbaycan səfirliytinə edilən silahlı hücum əvvəlcədən məqsədli şəkildə planlaşdırılmış terror aktıdır.
Ən nəhayət, İranın həyata keçirdiyi terror siyasəti onu məhvə aparır. Bundan qaçış yoxdur!
Trend
