Türkiyə prezidenti Rəcəb Tayyib Ərdoğan Cənubi Koreyadan qayıdarkən təyyarədə jurnalistlərin suallarını cavablandıraraq gündəmdəki mühüm məsələləri dəyərləndirib.
Musavat.com "Haberler.com" portalına istinadən xəbər verir ki, Ərdoğan Türkiyə ilə Azərbaycan arasındakı münasibətlərin klassik diplomatik təmaslardan çox üstün olduğunu vurğulayıb.
Azərbaycan Prezidenti İlham Əliyevlə sıx əlaqədə olduğunu deyən Türkiyə dövlət başçısı, fövqəladə bir hal yaşanmazsa, 8 Noyabr Zəfər Günündə Azərbaycana səfər etməyi planlaşdırdığını açıqlayıb:
"8 Noyabr Azərbaycanın Zəfər Günüdür. Fövqəladə bir hal baş verməzsə, mən də 8 noyabrda Azərbaycana səfər etməyi düşünürəm. İnşallah, bu səfər çərçivəsində lazımi addımları atmaq imkanımız olacaq".
Türkiyə lideri iki ölkə arasında diplomatik əlaqələrin müxtəlif səviyyələrdə fasiləsiz davam etdiyini diqqətə çatdırıb:
"Azərbaycan Prezidenti möhtərəm İlham Əliyevlə artıq telefon danışıqları aparmışam. Bu arada həm Milli Kəşfiyyat Təşkilatının rəhbərini, həm də Xarici İşlər nazirimi Azərbaycana göndərdim. Eyni zamanda, istər İlham bəylə, istərsə də xanımlar arasında telefon diplomatiyası aparılır. Onlar da 8 Noyabr Zəfər Gününə böyük önəm verirlər. Hər zaman deyirəm, bizim Azərbaycanla münasibətlərimiz klassik diplomatik təmasların çox fövqündədir. İki ölkənin qırılmaz bağı ortaq tariximizin, mədəniyyətimizin, taleyimizin və inşallah, gələcəyimizin bəhrəsidir. Türkiyə və Azərbaycan qardaşlığının aşa bilməyəcəyi heç bir maneə yoxdur".
Seul səfərini dəyərləndirən Ərdoğan Koreya prezidenti Li Çje Myonun dəvəti ilə həyata keçirilən səfərin çox məhsuldar keçdiyini qeyd edib.
Onun sözlərinə görə, iki ölkə arasında 11 milyard dolları keçən ticarət dövriyyəsini 15 milyard dollara çatdırmaq planlaşdırılır.
Türkiyə lideri bildirib ki, nüvə enerjisi sahəsində yeni iradə nümayış etdirilib. Müdafiə sənayesində isə "Altay" tankı, "Fırtına" haubitsaları, PUA və hava hücumundan müdafiə sistemləri daxil olmaqla, kompleks texnoloji əməkdaşlıq məsələləri nəzərdən keçirilib. Enerji, mədənçilik, elmi əməkdaşlıq, layihələrin maliyyələşdirilməsi və investisiya sahələrində 5 vacib sənəd imzalanıb.
Ukrayna prezidenti Volodimir Zelenskinin Türkiyəyə səfərinə toxunan Ərdoğan müharibənin diplomatiya yolu ilə bitirilməsinin vacibliyini qeyd edib:
"Cənab Zelenski ilə görüşümüzdən sonra indi cənab Putinlə də danışıqlar apararaq məsələnin Rusiya tərəfini müzakirə etmək istəyirik. Xarici İşlər nazirim başda olmaqla, aidiyyəti şəxslər həmkarları ilə əlaqə saxlayaraq Rusiya tərəfini bu görüşə hazırlayacaqlar".
ABŞ-dəki aralıq seçkilərinin nəticələrinə münasibət bildirən Ərdoğan Türk-Amerikan əlaqələrinin köklü və möhkəm təməllərə söykəndiyini xatırladıb:
"NATO müttəfiqi və uzunillik strateji münasibətlərə malik iki ölkəyik. Regionumuzda qalıcı sülhün və sabitliyin bərqərar olması üçün həm ABŞ administrasiyası, həm də Konqreslə sıx dialoqumuzu davam etdirəcəyik".
Terrorla mübarizə prosesindən danışan prezident Ərdoğan "Terrorsuz Türkiyə" layihəsinin qanunvericiliyin müəyyən etdiyi çərçivədə qətiyyətlə davam etdiyini bildirib:
"Sərhədlərimizdən kənardakı mağaralar mərhələli şəkildə təmizlənir. Təsbit və təsdiq işləri planlaşdırıldığı kimi gedir. Silahların tamamilə yere qoyulması ilə yeni mərhələyə keçəcəyik".
Fon məsələsi və məhkəmə proseslərinə toxunan Türkiyə lideri qanunsuzluq və rüşvətlə mübarizədə heç bir güzəştin olmayacağını vurğulayıb:
"Haqsız qazanc əldə edən, kapital bazarlarını manipulyasiya edən hər kəs qanun qarşısında cavab verəcək. Dövlət büdcəsindən istifadə olunmadan bu proses idarə olunur. Ödənişlər ardıcıl şəkildə həyata keçirilir".
AK Partiyanın hakimiyyətə gəlməsinin 24-cü ildönümünü dəyərləndirən prezident Ərdoğan sözlərini belə yekunlaşdırıb:
"24 il əvvəl təhvil aldığımız əmanətə verdiyimiz dəyər bu gün də eyni qətiyyətlə davam edir. O vaxtkı Türkiyə ilə bugünkü ölkəmizi müqayisə etməyə günlər yetməz. Dayanmaq yoxdur, yola daha güclü, daha əzmli və qərarlı şəkildə davam edirik".
İqbal RZAYEV,
Musavat.com
