[/center]Türkiyə Prezidenti Rəcəb Tayyib Ərdoğanın sədrliyi ilə keçirilən 2026-cı il Ali Hərbi Şurasının iclasında Silahlı Qüvvələrin komandan heyəti ilə bağlı mühüm qərarlar qəbul edilib.
Nyus.Az xəbər verir ki, qərarlara əsasən, Türkiyə Hərbi Hava Qüvvələrinin komandanı ordu generalı Ziya Camal Kadıoğlu ştat məhdudiyyəti səbəbindən təqaüdə göndərilib. Onun yerinə Döyüş Hava Qüvvələrinin komandanı ordu generalı Rafet Dalkıran təyin edilib.
Hərbi Dəniz Qüvvələrinin komandanı admiral Ərcümənt Tatlıoğlunun səlahiyyət müddəti isə 30 avqust 2026-cı ildən etibarən daha bir il uzadılıb.
Prezident Kompleksində keçirilən Ali Hərbi Şuranın iclasından sonra Ərdoğan qəbul edilən qərarları imzalayıb. İclasda vitse-prezident Cevdet Yılmaz, milli müdafiə naziri Yaşar Gülər və Baş Qərargah rəisi ordu generalı Səlcuq Bayraktaroğlu da iştirak ediblər.
Ərdoğan iclasdan sonra sosial şəbəkədə açıqlama verərək bildirib:
“Bu gün keçirdiyimiz Ali Hərbi Şurada qəbul etdiyimiz qərarlar ölkəmiz, millətimiz və qəhrəman ordumuz üçün xeyirli olsun”.
Şuranın qərarlarına əsasən, avqustun 30-dan 25 general və admiral bir üst rütbəyə yüksəldilib. 69 polkovnik isə general və admiral rütbəsi alıb. Bundan başqa, 24 generalın xidmət müddəti bir il, 530 polkovnikin xidmət müddəti iki il uzadılıb.
Qərarlar nəticəsində Türkiyə Silahlı Qüvvələrində hazırda 328 olan general və admiral sayının avqustun 30-dan 334-ə yüksələcəyi açıqlanıb.
Şura çərçivəsində iki general yaş həddinə görə sentyabrın 1-dən, 61 general və admiral isə ştat məhdudiyyəti səbəbindən avqustun 30-dan təqaüdə göndəriləcək. Beləliklə, ümumilikdə 63 general və admiral Silahlı Qüvvələrdən ayrılacaq.
Diqqətçəkən qərarlardan biri Türkiyənin ilk astronavtı Alpər Gezeravcı ilə bağlı olub. Hərbi Hava Qüvvələrinin pilot-polkovniki olan Gezeravcı briqada generalı rütbəsinə yüksəldilib.
Təqaüdə göndərilən Hərbi Hava Qüvvələrinin komandanı Ziya Camal Kadıoğlu isə Ali Hərbi Şuranın iclasından sonra Prezident Ərdoğanla vida görüşü keçirib. (Musavat.com)
Nyus.Az
