Bu ilin yanvar-sentyabr aylarında Azərbaycanda pərakəndə ticarət şəbəkəsində istehlakçılara 1 milyard 386,4 milyon manatlıq əczaçılıq məhsulları və tibbi ləvazimatlar satılıb.
Dövlət Statistika Komitəsinin məlumatına görə, bu, 2025-ci ilin ilk 9 ayı ilə müqayisədə 21,5 % çoxdur. Ötən 9 ay ərzində alıcıların son istehlak məqsədilə aldıqları mallara xərclədiyi vəsaitin 2,7 %-i əczaçılıq məhsulları və tibbi ləvazimatların alınmasına sərf olunub.
Cebhe.info xatırladır ki, bu ilin yanvar-sentyabr aylarında Azərbaycanda pərakəndə ticarət şəbəkəsində istehlakçılara 50,8 milyard manatlıq, o cümlədən 27,5 milyard manatlıq ərzaq məhsulları, içkilər və tütün məmulatları, 23,3 milyard manatlıq qeyri-ərzaq malları satılıb. 2025-ci ilin yanvar-sentyabr ayları ilə müqayisədə pərakəndə ticarət dövriyyəsi real ifadədə 3,8 %, o cümlədən ərzaq məhsulları, içkilər və tütün məmulatları üzrə 1,4 %, qeyri-ərzaq malları üzrə 6,7 % artıb.
Dərman satışının kəskin şəkildə artması əhalinin qeyri-sağlam olduğunu deməyə əsas verirmi?
Azərbaycan Tibb Universitetinin Farmakologiya kafedrasının dosenti Aydın Əliyev Musavat.com-a deyib ki, bu, biznes nöqteyi-nəzərindən, eləcə də büdcə baxımından müsbət göstərici kimi qiymətləndirilə bilər.
“Amma məsələnin digər tərəfləri də var. Dərman satışının artması əhalinin sağlamlığı ilə bağlı müəyyən problemlərin mövcudluğuna da işarə edə bilər. Bu baxımdan, əhalinin sağlamlıq vəziyyəti ilə bağlı narahatlıqların olduğunu söyləmək mümkündür. Amma burada başqa bir məsələyə də toxunmaq istəyirəm. Təəssüf ki, əhalinin müəyyən hissəsi həkim məsləhəti olmadan dərman qəbul edir. İnanın ki, bu, çox geniş yayılıb. Məsələn, bir insan deyir ki, ürəyim ağrıyır. Qonşusu isə ona məsləhət görür ki, mənim də ürəyim ağrıyırdı, filan dərmanı aldım, qəbul etdim, xeyrini gördüm. Həmin şəxs də gedib o dərmanı alır və qəbul etməyə başlayır. Halbuki bu, qətiyyən düzgün yanaşma deyil”,_ deyə A.Əliyev bildirib.
Farmokoloqa görə, əgər dərman satışının artması biznes baxımından faydalı görünürsə, digər tərəfdən, insanların sağlamlığı üçün ciddi təhlükələr yarana, xəstəliklərin ağırlaşmasına səbəb ola bilər: “Çünki insanın ürək nahiyəsində ağrı hiss etməsi heç də mütləq ürək xəstəliyinin olması demək deyil. Ağrının səbəbi onurğa ilə, sinirlərlə, qaraciyərlə və ya qanla bağlı problemlər ola bilər. Görün, eyni simptomun arxasında nə qədər müxtəlif səbəblər dayana bilər. Səbəb müəyyənləşdirilmədən dərman qəbul etmək isə vəziyyəti daha da ağırlaşdıra bilər.
Ona görə də həkim məsləhəti olmadan dərman qəbul etmək olmaz. İnsan özbaşına dərman içməklə, əslində, öz sağlamlığına zərər vurmaq riski yaradır. Bu gün sosial şəbəkələrdə, xüsusilə “TikTok” və “YouTube”-da dərmanlarla bağlı müxtəlif məlumatlar yayılır. Kimsə qəzetdə nə isə oxuyur, kimsə televiziyada dərman reklamına baxır və həmin preparatın ona da lazım olduğunu düşünür. Reklamın olması başadüşüləndir, amma əsas məsələ budur: reklam olunan dərman konkret insana lazımdırmı, onun xəstəliyinə uyğundurmu, başqa qəbul etdiyi preparatlarla ziddiyyət yarada bilərmi? Bunu həkim müəyyənləşdirməlidir. Bütün bu məsələlər, bir tərəfdən, əhalinin sağlamlığı ilə bağlı problemləri göstərir, digər tərəfdən isə insanların öz sağlamlıqlarına münasibətində ciddi çatışmazlıqlar olduğunu ortaya qoyur. Təəssüf ki, bir çox insan həkimə müraciət etmədən, mütəxəssislə məsləhətləşmədən öz-özünə diaqnoz qoyur və özünü müalicə etməyə çalışır. Halbuki insan hansı dərmanın ona faydalı, hansının isə zərərli olduğunu özbaşına müəyyənləşdirməməlidir. Bu məsələdə həkim məsləhəti əsasdır”.(Musavat.com)
Nyus.Az
