Tibb müəssisələrində çalışan əməkdaşlar iş mühiti, etik davranış qaydalarının pozulması, peşəkar münasibətlərdə yaranan problemlər və səlahiyyətdən sui-istifadə halları ilə bağlı narahatlıqlarını xüsusi "Etimad Xətti" vasitəsilə çatdıra biləcəklər. Nyus.Az xəbər verir ki, bununla bağlı məlumat TƏBİB tərəfindən yayılıb.
Bildirilib ki, "Etimad Xətti" (https://tabib.gov.az/vetendashlar-ucun/etimad-xetti) vətəndaşlar üçün deyil, dövlət tibb müəssisələrində çalışan əməkdaşların müraciətləri üçün nəzərdə tutulub. Tibb işçiləri keyfiyyətli tibbi xidmətin göstərilməsinə mane olan hallarla bağlı məlumatları yazılı şəkildə təqdim edə bilərlər. Qeyd olunub ki, daxil olan müraciətlər tam məxfilik şəraitində yalnız səlahiyyətli şəxslər tərəfindən araşdırılacaq.
TƏBİB-in açıqlamasına görə, təşəbbüsün əsas məqsədi təhlükəsiz və sağlam iş mühitinin qorunması, etik münasibətlərin gücləndirilməsi, həmçinin tibb müəssisələrində qarşılıqlı etimada əsaslanan peşəkar mühitin formalaşdırılmasıdır. Müraciət edən şəxslərdən hadisənin nə vaxt və hansı şəraitdə baş verdiyini, müşahidə olunan pozuntuları, əlaqədar şəxsləri və digər vacib detalları mümkün qədər dəqiq göstərmələri xahiş olunur. Bildirilir ki, təqdim olunan məlumatların ətraflı olması müraciətlərin operativ və obyektiv araşdırılmasına imkan verəcək.
TƏBİB eyni zamanda, xəbərdarlıq edib ki, böhtan xarakterli, qərəzli və ya əsassız məlumatların təqdim edilməsi qanunvericiliyə uyğun məsuliyyət yarada bilər. (Musavat.com)
Nyus.Az
