Bakıda çıxarışlı və çıxarışsız mənzillərin qiymət fərqini yalnız "neçə manat fərq edir" sualı ilə qiymətləndirmək düzgün olmaz. Bu fərq təkcə mənzilin satış qiymətində deyil, həm də satış sürətində, hüquqi təhlükəsizlikdə və alıcı marağında özünü göstərir.
Çıxarışlı mənzil dövlət tərəfindən tanınan və mülkiyyət hüququnu təsdiq edən rəsmi sənədə malik olur. Çıxarışlı mənzil alan şəxs daşınmaz əmlakın qanuni sahibi kimi dövlət reyestrində qeydiyyata alınır. Bu səbəbdən alıcılar belə mənzillərə daha çox üstünlük verirlər. Çıxarışlı mənzillərin əsas üstünlükləri ondan ibarətdir ki, onlar notariat qaydasında rahat şəkildə alınıb-satıla bilir, bank ipotekası ilə əldə oluna bilir, hüquqi risklər minimum səviyyədə olur, gələcəkdə satış prosesi daha asan baş tutur və mənzil sahibi Mənzil-Tikinti Kooperativindən (MTK) asılı vəziyyətdə qalmır.
Çıxarışsız mənzillər isə adətən MTK ilə bağlanmış müqavilələr əsasında rəsmiləşdirilir. Belə hallarda alıcı müəyyən riskləri öz üzərinə götürmüş olur. Çıxarış olmadığı üçün ipoteka almaq mümkün olmur, bəzi MTK-lar satış zamanı əlavə ödənişlər tələb edir, çıxarışın nə vaxt veriləcəyi məlum olmaya bilir və nəticədə potensial alıcıların sayı azalır. Bütün bu amillər mənzilin bazar qiymətinə təsir göstərir və çıxarışsız mənzillərin daha ucuz satılmasına səbəb olur.
Myus.A xəbər verir ki, Milli.Az-ın araşdırmasına görə, 2026-cı il üzrə Bakı əmlak bazarında eyni binada yerləşən oxşar mənzillər arasında çıxarışlı və çıxarışsız variantlar üçün orta hesabla 10-20 faiz qiymət fərqi müşahidə olunur.
Məsələn, 80 min manat dəyərində olan mənzildə bu fərq təxminən 8-15 min manat, 100 min manatlıq mənzildə 10-20 min manat, 150 min manatlıq mənzildə 15-30 min manat, 200 min manatlıq mənzildə isə 20-40 min manat arasında dəyişə bilər. Başqa sözlə, əksər hallarda çıxarışlı mənzil çıxarışsız analoqundan nəzərəçarpacaq dərəcədə baha satılır.
Satıcı baxımından da çıxarışlı mənzil daha sərfəli sayılır. Əgər çıxarışın alınması üçün 2-5 min manat civarında xərc tələb olunursa, əksər hallarda əvvəlcə çıxarışın alınması daha məqsədəuyğun hesab edilir. Çünki sonradan mənzili bazarda 10-30 min manat və ya daha yüksək məbləğə baha satmaq mümkün olur. Buna görə də həm alıcılar, həm də satıcılar üçün çıxarışlı mənzillər bazarda daha cəlbedici və etibarlı seçim hesab olunur.
Nyus.Az
