Bakıda polkovnikin idarə etdiyi avtomobillə qadını vuraraq ölümünə səbəb olduğu hadisənin bəzi detalları məlum olub.
Nyus.Az Xəzər TV-yə istinadən xəbər verir ki, hadisə Məhəmməd Naxçıvani küçəsində yerləşən 15 mərtəbəli binanın yeraltı dayanacağında baş verib.
Binanın komendantı Etibar Qasımovun sözlərinə görə, həyatını itirən Esmira Sadıqova həyətdəki zibil qutularından məişət tullantıları toplayırmış:
"Həyətdə bir nəfər xəbər verdi ki, qarajda qadın yıxılıb. Biz dərhal qaraja getdik. Qadının yerdə uzandığını gördük. Üç-dörd dəqiqə sonra qonşumuz Həsən müəllim təcili yardıma zəng etdi. Təcili yardım gəldi. Bizim köməyimizlə qadını xərəyə qoyub xəstəxanaya apardılar. Bir neçə saat sonra onun xəstəxanada vəfat etdiyi məlum oldu".
Komendant bildirib ki, Esmira Sadıqova həyətdəki zibil qutularından nəvələri üçün müxtəlif məişət əşyaları və geyimlər toplayırmış:
"O qadın həmişə həyətə gəlirdi. Müxtəlif həyətlərdən ərzaq, yararlı əşyalar və paltarlar yığırdı. Deyirdi ki, oğlum həbsdədir, nəvələrim üçün əşyalar toplayıb aparıram. Ehtiyacı olan bir qadın idi".
Hadisə şahidlərinin iddiasına görə, avtomobili idarə edən Həsən Seyidbəyov qadını vurduğundan xəbərsiz olduğunu bildirib. Onların sözlərinə görə, o, hadisədən sonra yeraltı dayanacağın pilləkənləri ilə mənzilinə qalxıb, daha sonra baş verənlərdən xəbər tutaraq təcili yardıma zəng edib.
Paytaxtın Yasamal rayonu ərazisində ağır qəza baş verib.
Nyus.Az qafqazinfo-ya istinadən xəbər verir ki, hadisə dünən saat 18:30 radələrində Naxçıvani küçəsi 15 ünvanında yerləşən çoxmərtəbəli binanın yeraltı parkinqində qeydə alınıb.
1958-ci il təvəllüdlü bina sakini Seyidbəyov Həsən Arif oğlu idarə etdiyi "Mitsubishi Outlander" markalı avtomobillə parkinqdən çıxarkən Sadıqova Esmira Həsənağa qızını vurub.
71 yaşlı qadın aldığı xəsarətlərdən xəstəxanada ölüb.
Faktla bağlı Yasamal RPİ-də cinayət işi başlanaraq istintaq aparılır.
Qeyd edək ki, H.Seyidbəyov əvvəllər yüksək vəzifələrdə çalışıb. O, Penitensiar Xidmətin Rabitə və texniki təminat şöbəsinin rəisi vəzifəsini tutub.
Nyus.Az
