ABŞ raket və pilotsuz uçuş aparatlarını işıq sürəti ilə məhv etməyə imkan verəcək lazer silahı hazırlayır.
Nyus.Az xəbər verir ki, bu barədə Ziare.Com nəşri yazır.
Uzun illərdir ki, yönləndirilmiş enerji silahları konsepsiyası ABŞ Müdafiə Nazirliyinin texnoloji səylərinin əsas istiqamətlərindən biri olub. Bu texnologiyanın əsas məqsədi klassik sursatların böyük həcmdə istifadəsinə ehtiyac olmadan hava hədəflərini işıq sürəti ilə zərərsizləşdirməkdir.
“Uzunmüddətli sınaqlar və gecikmələrdən sonra bu məqsədin real döyüş şəraitində həyata keçirilməsi perspektivi yaranıb. ABŞ administrasiyası AeroVironment şirkəti ilə Enduring High Energy Laser (E-HEL) sisteminin yaradılması üzrə danışıqların son mərhələsindədir”, - deyə materialda bildirilir.
Wired nəşrinin məlumatına görə, bu layihə ABŞ Quru Qoşunlarının silahlanmasına rəsmi şəkildə qəbul ediləcək ilk lazer silahına çevrilmək potensialına malikdir. Beləliklə, sistem indiyədək yalnız eksperimental prototiplər mərhələsində qalmış layihələrdən kənara çıxa bilər.
“Strateji kontekst ucuz dronların ənənəvi hava hücumundan müdafiə sistemlərini həddən artıq yükləyə bildiyi yeni dövrə uyğunlaşmaq zərurəti ilə müəyyənləşir. Bu isə dəyəri yüz minlərlə, minlərlə, hətta milyonlarla dollarla ölçülən bahalı raket-müdaxilə vasitələrindən istifadəni tələb edir. Bu kontekstdə E-HEL ABŞ Silahlı Qüvvələrinin yüksək enerjili lazer sistemləri ailəsinin hazırlanmasına yönəlmiş ilk proqramı kimi nəzərdən keçirilir. Sistem hava təhdidlərinə qarşı mübarizədə bahalı kinetik vasitələrdən asılılığı azaltmağa imkan verəcək”, - deyə nəşr yazır.
Qeyd olunur ki, Nyu-Meksiko ştatındakı Uayt-Sends raket poliqonunda keçirilən sınaqlar texnologiyanın effektivliyi və tətbiq imkanları baxımından müsbət nəticələr göstərib.
Bu istiqamətdə işlər yalnız quru qoşunları ilə məhdudlaşmır. İyul ayında ABŞ Hərbi Hava Qüvvələri pilotsuz uçuş aparatlarından müdafiə məqsədilə dünyanın müxtəlif nöqtələrində kompakt lazer sistemindən istifadə edildiyini təsdiqləyib.
“Bununla paralel olaraq, ABŞ Hərbi Dəniz Qüvvələri uzun illərdir HELIOS lazer silahını sınaqdan keçirir. Bu sistem optik kor etmə və müşahidə imkanlarına malikdir və yönləndirilmiş enerji əsasında silahların mərhələli şəkildə tətbiqi çərçivəsində esmineslərdə quraşdırılır”, - deyə nəşrdə əlavə olunur.
Eyni zamanda, lazer silahlarının geniş tətbiqinə ciddi maneələrdən biri də yüksək gücə malik şüanın orbitdəki peykləri və ya uçuş zamanı təyyarələri təsadüfən şüalandırması riskidir. Bu problem lazer sistemlərinin hərbi hissələrin gündəlik fəaliyyətinə inteqrasiyasını əhəmiyyətli dərəcədə çətinləşdirib.
Bu səbəbdən layihə uğurla başa çatsa belə, lazer sistemləri ənənəvi raket əleyhinə müdafiə vasitələrini tamamilə əvəz edə bilməyəcək.
Daha əvvəl ekspertlərə S-400 raketinin yağış nəticəsində yavaşıyıb-yavaşlamayacağı ilə bağlı sual ünvanlanmışdı. Onların sözlərinə görə, adi yağış raketin sürətini azalda bilməz. Lakin güclü tufanlar X-diapazonda izləmə üçün istifadə olunan yüksək tezlikli siqnalları uda bilər.
Eyni zamanda, The Telegraph yazıb ki, Ukrayna “Putinin sarayını” qoruyan hava hücumundan müdafiə vasitələrini məhv edir. Qeyd olunur ki, Vladimir Putin Ukrayna istehsalı uzaqmənzilli dronların zərbələrindən ehtiyat etdiyi üçün Qara dəniz sahilindəki bu iqamətgahına nadir hallarda gedir. (Musavat.com)
Nyus.Az
