Cənubi Amerikada görünməmiş soyuq hava hökm sürür.
Avropa bu yay isti hava dalğalarından əziyyət çəkərkən, Cənubi Amerikanın cənub bölgələri son onilliklərdə görünməmiş rekord temperatur və qar yağışı ilə müşayiət olunan olduqca şiddətli soyuq dalğası ilə qarşılaşıb.
Nyus.Az-ın məlumatına görə, şiddətli hava artıq bölgədə nəqliyyat xaosuna, xidmətlərdə fasilələrə və əhəmiyyətli kənd təsərrüfatı itkilərinə səbəb olub.
Bildirilir ki, yeni soyuq dalğa iyulun 17-də başlayacaq və bir həftədən çox davam edəcək. Antarktidadan arktikaya bənzər hava axını Argentinanın mərkəzi və şimal hissələrinə təsir edəcək. Dağlıq ərazilərə 30-50 santimetr qar yağacağı proqnozlaşdırılır.
Qeyd edilir ki, soyuq hava qitəyə nə qədər çox daxil olursa, temperatur iqlim normasından bir o qədər çox dəyişir. İyulun əvvəlində Argentinanın Mar-del-Plata şəhərinə qar yağıb - gənc sakinlər iyirmi ildən çoxdur ki, bunu görməyiblər.
"Gənc sakinlər həyatlarında ilk dəfə ağ örtük görüblər, çünki ora 22 ildir qar yağmırdı", - məlumatda vurğulanır.
Qeyri-adi hava şəraiti ciddi çətinliklər yaradıb. Qış təkərlərindən istifadə ənənəsinin olmaması səbəbindən yollar demək olar ki, iflic vəziyyətindədir və sürüşkən səkilərdə çox sayda insan xəsarət alaraq xəstəxanalara müraciət edib. Qəzetin məlumatına görə, kommunal xidmətlər qarı tez bir zamanda təmizləyə bilməyib.
Eyni zamanda, hakimiyyət orqanları Argentinanın 18 əyaləti üçün son dərəcə aşağı temperatur xəbərdarlığı verib və bu, otuz şəhərə də təsir edib. Ən soyuq ərazilərdə temperatur -15 dərəcəyə qədər düşüb.
Qeyd edildiyi kimi, iyun ayının sonlarında baş verən əvvəlki soyuq dalğa Braziliyanın cənubuna da təsir edib, Uruqvay və Paraqvayda isə orta temperatur uzunmüddətli orta səviyyədən xeyli aşağı olub. Bu qeyri-adi şaxtalar kənd təsərrüfatı məhsullarına ciddi ziyan vurub.
Hava anomaliyası xüsusilə Braziliyanın San-Paulu şəhərində də müşahidə olunub. Məlumata görə, günün ən isti vaxtında belə, orada temperatur son 30 ildə görünməmiş səviyyəni - 13,5 dərəcə Selsini - keçməyib. (Lent.az)
Nyus.Az
