Rusiya Silahlı Qüvvələri Ukraynanın bir sıra vilayətlərindəki kritik və çox önəmli infrastruktur obyektlərinə qanadlı raketlərlə zərbələr endiriblər.
Nyus.Az milli.az-a istinadən bildirir ki, "Qisas əməliyyatı" adlandırılan bu zərbələr seriyasında bir neçə istilik-elektrik stansiyası, dəmiryol vağzalı, nəqliyyat qovşağı və s. vurulub.
Dnepropetrovsk, Kremençuq, Poltava, Sumı və Xarkov vilayətlərində ən böyük istilik-elektrik stansiyalarına raket zərbələri endirilib.
Partlayışlar Xarkovdakı ən böyük İES sayılan İES-5-də səngimir.
Rusiyanın "Kalibr" və X-101 tipli qanadlı raketlərdən istifadə etdiyi vurğulanır.
Ukrayna Hava Hücumundan Müdafiə Qüvvələrinin Baş Komandanlığının verdiyi məlumata görə, 9 raket səmada vurulub.
Rusiya niyə belə edir?
Səbəb sadədir.
Ukraynanın elektroenerji infrastrukturunu əksər hissəsi ölkənin şərq və cənub-şərq vilayətlərində yerləşir.
Ukraynada 4 atom-elektrik stansiyası var - Zaporojye AES-i, Rovensk AES-i, Xmeltnisk AES-i və Cənubi Ukrayna AES-i (Nikolayev vilayəti).
AES-lərdə də 15 reaktor var ki, onların VVER-1000 tipli 6-sü Enerqodar şəhərindəki AES-dədir. Həmin 6 reaktor AES-dəki elektroenerji istehsalının 40 faizini və Ukraynanın elektroenerji balansının 20 faizini təmin edir.
Enerqordar rusiyalıların nəzarətindədir. Bu gecə isə rusiyalılar Zaporojye AESdə çalışan sonuncu, 6-cı enerji bloku elektroenerji şəbəkəsindən ayırıblar, "soyuq" vəziyyətə gətirələrək dondurmağa hazırlamağa başlayıblar.
"Qisas əməliyyatı" zamanı rusiyalılar ən önəmli istilik-elektrik stansiyalarını vuraraq Ukraynanın şimal, şərqi və mərkəzi vilayətlərini işıqsız qoymağa çalışıblar.
Ukraynanın elektroenerji sistemi bu problemin öhdəsindən gələ bilmədiyindən Cənubi Ukrayna və Xmeltnisk AES-lərdə enerji bloklarının istehsal gücü süni şəkildə azaldılıb.
Nyus.Az
