Havanın istiləşməsi ilə birlikdə Azərbaycanda çimərlik mövsümü də rəsmən başlayıb. İnsanların dəniz sahillərinə axını artdığı bir vaxtda mütəxəssislər və aidiyyəti qurumlar çimərlikdə təhlükəsizlik və gigiyena qaydalarına ciddi riayət olunmasının vacibliyini vurğulayırlar.
Nyus.Az xəbər verir ki, Fövqəladə Hallar Nazirliyi xəbərdarlıq edir ki, yalnız rəsmi şəkildə fəaliyyət göstərən, xilasetmə xidməti və tibbi nəzarət olan çimərliklərə üz tutmaq lazımdır.
"Qadağan olunmuş ərazilərdə çimmək həyati təhlükə yaradır. Ən çox boğulma halları məhz bu zonalarda baş verir", - deyə qurumdan bildirilib.
Səhiyyə mütəxəssisləri isə vətəndaşları gigiyena qaydalarına diqqət yetirməyə çağırır. Qeyri-sanitar vəziyyətdə olan, tullantı suları ilə çirklənmiş sahillərdə çimmək dəri xəstəlikləri, göbələk və digər infeksiyalara yoluxa bilmək riskini artırır. Bu səbəbdən rəsmi orqanların təsdiqlədiyi təmiz və nəzarət olunan çimərliklərə üstünlük verilməlidir.
Eyni zamanda günəş şüalarının zərərli təsirlərindən qorunmaq üçün günün ən isti saatlarında - saat 11:00-dan 16:00-dək çimərlikdə uzun müddət qalmaq tövsiyə edilmir. Həmçinin günəş eynəkləri, qoruyucu kremlər və baş geyimlərindən istifadə edilməlidir.
Uşaqlarla çimərliyə gedən valideynlər üçün isə xüsusi diqqət tələb olunur. Balacalar daim nəzarət altında saxlanmalı, şişmə üzgüçülük vasitələrinə güvənilməməlidir.
Ekoloqlar çimərlikdə ətraf mühiti qorumağın da vacib olduğunu xatırladır: tullantıları ətrafa yox, müəyyən edilmiş qutulara atmaq, dəniz canlılarını narahat etməmək və təbiətə hörmətlə yanaşmaq hər bir vətəndaşın məsuliyyətidir.
Rəsmi qurumlar bildirir ki, yay mövsümündə çimərliklərdə mütəmadi yoxlamalar aparılacaq, təhlükəsizlik və sanitariya qaydalarına əməl olunmayan obyektlərə qarşı inzibati tədbirlər görüləcək.//Milli.Az //
Nyus.Az
