Son zamanlar paytaxtdakı "Xankəndi", "Qurd qapısı", Top Qapı", "Şüa" və s kimi məşhur restoranlar, eləcə də, şadlıq evlərinin mətbəxindəki antisanitar vəziyyətlə bağlı görüntülərə şahid olduq.
Onların bir çoxu ciddi xəbərdarlıqlar alıb cərimə edildi. Hətta bəzisinin rəhbəri barəsində inzibati icraata başlanıldı.
Amm buna baxmayaraq, hələ də antisanitar vəziyyətdə olan xidmət obyektləri qalmaqdadır.Bu azmış kimi hər fürsətdə toy masalarının qiymətləri qaldırılır. Özü nə az, nə çox ildə iki dəfə...
Bəs, ildə iki dəfə toy qiymətlərini artıran bu iaşə müəssisələrinin mətbəxini müştəri görə bilərmi? İstehlakçının buna hüququ varmı?
Mövzu ilə bağlı Bizim.Media-ya danışan Azad İstehlakçılar Birliyinin sədri Eyyub Hüseynovun fikrincə, bu, hər bir istehlakçının hüququdur. Müştəri bunu restoran sahibindən tələb edə bilər:
"Azad İstehlakçılar Birliyi xeyli öncə bir layihə çərçivəsində Bakıdakı bir çox restoranlarda monitorinqlər aparmışdı. Çox təəssüf ki, elə əhəmiyyətli layihə biznes qurumları tərəfindən boğuldu. Biz həmin layihə zamanı bir çox restoranlarda zalların mətbəxlə qətiyyən uyğun gəlmədiyini müşahidə etdik.
Şəhərin mərkəzindəki ən bər-bəzəkli zalı olan restoranların mətbəxinin necə bərbad gündə olduğunu gördük. Hətta belə restoranlardan birində mətbəxinin antisanitar olmasıyla yanaşı, başqa yerdə bilşirilən köhnə yeməklərin ora gətirilərək qızdırılıb müştəriyə verildiyinin də şahid olduq.
Biz ifşaedici işlərdən sonra mərkəzdəki restoranlardan yalnız birində mətbəxi göstərən monitor quraşdırılmasına nail olduq. Zalda oturan istehlakçılar mətbəxdə yeməyin necə hazırlandığını bu şəkildə görə bilirlər. Həmin restoran hələ də çalışır. Bəzi ölkələrdə bu yöntəm tətbiq olunur".
Eyyub Hüseynov bildirib ki, onlar istehlakçılara mətbəxini görmək mümkün olan restoranlara üz tutumağı tövsiyə edirlər:
"Biz istehlakçılara çağırış edirik, deyirik o restoranlarda yemək yeyin ki, oranın mətbəxini görmək mümkündür. Şəhərimizdə bir neçə belə restoran var. Onların mətbəxləri açıqdır.
İstənilən müştəri gedib kənardan müşahidə edə bilər. Lakin bir çox restoranlar istehlakçılar ora mikrob sala bilər bəhanəsi ilə mətbəxini bağlı saxlayır və nəticədə fəaliyyəti gözdən iraq olur. Bu sahədə çox ciddi problemlər var. O cümlədən bəzi şadlıq evlərində də vəziyyət belədir. Bu müəssisələrdə tələb çox olduğu üçün istehlakçıya nə desən təklif olunur.
Əlbəttə, burda istehlakçının, toy sahibinin hüququ var ki, mətbəxdə nə baş verdiyini müşahidə etsin. Lakin burda da bəziləri mətbəxlərini bağlı saxlayırlar ki, guya kimsə girsə, oranı çirkləndirə bilər. Təəssüf ki, belə yerlərdə antisanitariya faktları həddən artıq çoxdur".
Birlik rəhbərinin fikrincə, belə halların aradan qaldırırlması üçün Qida Təhlükəsizliyi Agentiyinə xüsusi səlahiyyətlər verilməlidir. Onların bu mənada əl-qolu bağlıdır. Qəfil yoxlama həyata keçirə bimirlər. Çünki yoxlama aparılması üçün prosedurlar həddindən artıq bürokratikdir. Bunun üçün gərək əvvəlcədən obyektə xəbərlarlıq edilsin ki, sizi yoxlamağa gəlirik. Nəyi yoxlayacağıq, və s..
Belə olanda da bu artıq yoxlama yox, elə-belə bir iş olur. Biznes qurumları hökumətin onlar üçün yaratdlğı son dərəcə rahat şəraitdən sui istifadə edirlər.
Ona görə də Qida Təhlükəsizliyi Agentliynin əsasnaməsinə dəyişiklik edilməlidir. Onlar obyektlərə xəbərdarlıq etmədən, cəld yoxlama aparmaq səlahiyyətinə sahib olmalıdırlar".
Nyus.Az
