[/center]Boğazda düyünlənmə hissi adətən qalxanabənzər vəzi ilə bağlı problemlər, o cümlədən həm kəskin, həm də xroniki formada olmaqla, boğazın müxtəlif iltihablı xəstəlikləri fonunda baş verir.
Nyus.Az xəbər verir ki, bu barədə rusiyalı həkim, otolarinqoloq Yekaterina Prikaza danışıb.
Onun sözlərinə görə, bu simptomun daha az rast gəlinən səbəbləri sırasında boyun fəqərəsinin osteoxondrozu da var.
"Boğazda düyün və ya sıxılma hissi qalxanabənzər vəzinin iltihabı və ya genişlənməsinin göstəricisi ola bilər. Bəzən səbəbi mədə-bağırsaq traktında da axtarmaq lazımdır. Düyün hissi qida borusunun iltihabı və ya qastroezofageal reflyuks xəstəliyi zamanı ortaya çıxır ki, bu zaman xəstədə daim mədə şirəsinin qida borusuna düşməsi baş verir. Bəzən boğazda düyünlənmə onurğa sütununun boyun hissəsinin osteoxondrozu ilə də əlaqəli ola bilər, baxmayaraq ki, bu, xəstəliyin ən bariz əlamətlərindən deyil. Xoşagəlməz hisslər udlaqda həssaslığa cavabdeh olan sinir uclarının sıxılması zamanı da yarana bilər", - deyə həkim qeyd edib.
Əgər tez-tez boğazınızda düyünlənmə hissi yaranırsa, o zaman siz müayinəyə otorinolarinqoloqa getməklə başlaya bilərsiniz.
"Çox vaxt düyünlənmə laringit, faringit və ya tonzillitə işarə edə bilər. Digər mümkün variant postnazal axıntıdır ki, bu zaman burun boşluğundan gələn selik davamlı olaraq udlağın arxa divarı ilə axır. Boğazda xarici bir cismin olması hissi ilə yanaşı, bu vəziyyət həmçinin tez-tez uzanmüddətli öskürək ilə də müşayiət olunur. Postnazal axıntı daha çox burun və burun sinuslarının iltihabi xəstəliklərindən sonra, xroniki rinit və allergik rinitdən sonra baş verir", - deyə Yekaterina Prikaza əlavə edib.
Onun sözlərinə görə, əgər lor orqanlarınızla hər şey qaydasındadırsa, o zaman terapevtə müraciət edə bilərsiniz. Terapevt şikayətləri və anamnezləri dəqiqləşdirəcək və müayinə üçün konkret mütəxəssisə göndəriş verəcək. (oxu.az)
Nyus.Az
