Xaricdən avtomobil almaq istəyən paytaxt sakini dələduzluğun qurbanı olduğunu iddia edir.
Nyus.Az Xəzər TV-yə istinadən bildirir ki, Rəvan Vəliyev bildirir ki, "TikTok"dakı "Narıncı Mustang" səhifəsi vasitəsilə iki avtomobilin gətirilməsi üçün 3 min 545 manat ödəyib. Lakin onun sözlərinə görə, aylar keçsə də, nə avtomobillər gətirilib, nə də ödədiyi pul geri qaytarılıb.
"Xəzər Xəbər"in qaynar xəttinə müraciət edən paytaxt sakini Rəvan Vəliyev "Narıncı Mustang" səhifəsinin təmsilçisi kimi təqdim olunan Fərid adlı şəxslə görüşüb. Şikayətçinin sözlərinə görə, tərəflər nəqliyyat vasitələrinin hissəli ödənişlə gətirilməsi və lizinq yolu ilə rəsmiləşdirilməsi barədə razılığa gəliblər.
Şikayətçi deyir ki, ona əvvəlcə avtomobillərin elan linkləri göndərilib, daha sonra isə nəqliyyat vasitələrinin alındığı bildirilib. Lakin onun sözlərinə görə, bu məlumatı təsdiqləyən hər hansı sənəd, foto və ya videogörüntü təqdim edilməyib.
Səsləndirilən iddialarla bağlı Fərid adlı şəxslə telefon vasitəsilə əlaqə saxladıq. O, məsələni Rəvan Vəliyevlə danışaraq yoluna qoyduğunu bildirdi. İddiaların digər detalları ilə bağlı isə əlavə açıqlama vermədi. Zərərçəkmiş Rəvan Vəliyev isə onunla heç bir razılığın əldə olmadığını təkrar qeyd etdi.
Ekspertlərin sözlərinə görə, bu fakt bir daha göstərir ki, xaricdən avtomobil sifariş edərkən yalnız sosial şəbəkələrdəki paylaşımlara və şifahi vədlərə güvənmək ciddi maliyyə itkisi ilə nəticələnə bilər. Ödənişdən əvvəl vasitəçi və ya şirkətin hüquqi qeydiyyatı, fəaliyyəti və etibarlılığı yoxlanılmalı, bütün şərtlər yazılı müqavilədə göstərilməlidir. Hərrac sənədi, avtomobilin VIN-kodu və daşınma məlumatları tələb edilməli, pul təyinatı qeyd olunmaqla rəsmi hesab üzərindən köçürülməlidir.
Nyus.Az
