Fransada gələcək prezident seçkiləri ərəfəsində mümkün Rusiya müdaxiləsi ilə bağlı araşdırma başlanıb. Paris prokurorluğu ölkənin üç tanınmış siyasətçisi – Eduar Filipp, Qabriel Attal və Rafael Qlüksmana qarşı yayılan saxta materialların arxasında Rusiya ilə əlaqəli şəbəkələrin olub-olmadığını araşdırır.
Nyus.Az xarici agentliklərə istinadən xəbər verir ki, istintaq hazırda saxta materialların yayılma şəraitini müəyyənləşdirir, faktların yoxlanılması və onların hüquqi tövsifi aparılır.
Keçmiş baş nazir Qabriel Attal avqustun 7-də rəsmi şikayət verib. Onun vəkillərinin bildirdiyinə görə, sosial şəbəkələrdə Attal haqqında dipfeyk videolar və Fransanın tanınmış media orqanlarının saxtalaşdırılmış ilk səhifələri yayılıb.
Bu materiallarda siyasətçinin guya Parkinson xəstəliyindən əziyyət çəkdiyi və narkotik maddələrdən istifadə etdiyi iddia olunub. Attal kampaniyanın arxasında Rusiya ilə əlaqəli şəbəkələrin dayandığını bildirib.
Digər mümkün prezidentliyə namizəd, keçmiş baş nazir Eduar Filipp də oxşar kampaniyanın hədəfinə çevrilib. Saxta videolarda onun guya Parkinson xəstəliyinə tutulduğu barədə məlumatlar yayılıb. Filipp özü bunları şərh etməsə də, yaxın çevrəsi kampaniyanı ehtimal olunan Rusiya müdaxiləsi ilə əlaqələndirib.
Üçüncü siyasətçi Rafael Qlüksmanla bağlı kampaniyada isə onun tərəfdaşı, tanınmış jurnalist Lea Salame hədəfə alınıb. Yayılan materiallarda Salamenin Qlüksmanın prezidentliyə namizədliyini təşviq etmək məqsədilə media qurumlarını guya pulla ələ aldığı iddia edilib.
Qlüksman iyulun 14-də Rusiyanın Fransa seçkilərinə mümkün müdaxiləsinin qarşısının alınmasına çağırmış, avqustun 12-də isə məsələ ilə əlaqədar hüquq-mühafizə orqanlarına şikayət etdiyini açıqlamışdı.
Beləliklə, Paris prokurorluğunun araşdırması Fransanın gələcək prezident seçkilərində adı hallanan üç siyasətçiyə qarşı aparıldığı iddia edilən dezinformasiya kampaniyalarını əhatə edir. İstintaqın əsas məsələlərindən biri bu əməliyyatların həqiqətən Rusiya ilə əlaqəli strukturlar tərəfindən koordinasiya edilib-edilmədiyini müəyyənləşdirməkdir. (Musavat.com)
Nyus.Az
