Azərbaycanda təmassız ödəniş texnologiyalarından (NFC) istifadə edilən bank kartları ilə bağlı yeni növ dələduzluq halları ortaya çıxıb.
Bəs bundan necə qorunaq?
Nyus.Az xəbər verir ki, məsələ ilə bağlı kibertəhlükəsizlik mütəxəssisləri bu barədə vətəndaşları xəbərdar edərək, xüsusilə "Apple Pay" və "Google Wallet" istifadəçilərinin risk altında olduğunu vurğulayıblar.
Yeni fırıldaq sxemində dələduzlar özlərini kuryer, bazar satıcısı və ya dövlət xidmətinin nümayəndəsi kimi təqdim edərək istifadəçilərdən kart məlumatlarını əldə edirlər. Bu məlumatlar sonra onların smartfonlarına əlavə edilərək, kart sahibinin xəbəri olmadan alış-verişlərdə istifadə olunur.
Bundan əlavə "Ghost Tap" (Kabus toxunuşu) adlı yeni metodla NFC siqnalı bir cihazdan digərinə ötürülərək, fırıldaqçılar uzaqdan, hətta başqa ölkələrdən belə ödənişlər həyata keçirə bilirlər.
Kibertəhlükəsizlik üzrə ekspertlər vətəndaşlara aşağıdakı təhlükəsizlik tədbirlərinə riayət etməyi tövsiyə edirlər:
"Onlayn ödənişlərdə virtual kartlardan istifadə edin və balansı yalnız ehtiyac yarandıqda artırın. Tanımadığınız saytlara və proqramlara kart məlumatlarını daxil etməyin, xüsusilə PIN kodu tələb olunursa. Kartınızı naməlum tətbiqlərə qoşmayın.Nağd əməliyyatlar üçün fiziki kartdan istifadə edin. Push və SMS bildirişlərini aktiv saxlayın.Antivirus proqramlarında "təhlükəsiz ödəniş" funksiyasından istifadə edin".
Ekspertlər həmçinin qeyd edirlər ki, artıq dələduzların kartı fiziki olaraq oğurlamasına ehtiyac qalmayıb. Az miqdarda məlumatla belə vəsaitlərə nəzarət etmək mümkündür. Bu səbəbdən rəqəmsal təhlükəsizlik vərdişləri hər zamankindən daha vacibdir.//milli.az/
Nyusi.Az
