"Dünən qardaşım, Əməkdar artist Səyavuş Şəfiyevin doğum günü idi. Bacı və qardaşım məni tək qoyublar. Ailədə heç kim qalmayıb. Səhər açılandan o qədər ağlamışam ki.. (ağlayır). Səyavuşun məzarını ziyarət edərək dualar oxudum. Səyavuş çox sakit təbiətli, yumuşaq insan idi. Moskvada sirkdə işləyirdi. Daha sonra gəlib Azərbaycanda işlədi. Mən çox arıq qız idim. Həmişə məni qucağına götürüb atıb-tutardı. Həmişə də deyərdi ki, "bunu özümə köməkçi götürəcəm". Anam da deyərdi ki, "evə ikinci sirk artisti lazım deyil". Biz hamımız onunla fəxr edirdik. Nəinki bizim, o bizim bütün qohumların sevimlisi idi.. Biz ona "Saşa" deyirdik. Səyavuş Moskvadan gələndə toy-bayram idi"
Nyus.Az xəbər verir ki, bunu Moderator.az-a açıqlamasında mərhum aktyor, Əməkdar artist Səyavuş Şəfiyevin bacısı İradə Qasımova deyib. O, daha sonra qardaşını geniş tamaşaçı kütləsinə sevdirən və tanıdan "Əhməd haradadır?" filmindəki Əhməd rolundan danışıb:
"O, bu filmə çəkiləndə mən uşaq idim. Adil İsgəndərov onu dəvət etmişdi. Biz də sevilirdik ki, qardaşım filmə çəkilir. Onu bilirəm ki, sınaq çəkilişindən sonra onu dərhal rola dəvət ediblər. Ondan başqa aktyoru sınamayıblar. Necə sakit təbiətli idisə, çəkildiyi filmlərdə də həmin xarakterini nümayiş etdirirdi" deyə o, bildirib.
İradə Qasımova qardaşının iki dəfə ailə həyatı qurduğunu bildirib:
"Səyavuş iki dəfə ailə həyatı qurub. Birinci həyat yoldaşı da rus idi, amma o sirkdə işləyirdi. Kəndirin üstündə gəzirdi. Sonra müəyyən səbəblərə görə ayrıldılar. İkinci dəfə bizdən xəbərsiz ailə həyatı qurdu. Moskvadan təyyarədən düşən kimi xanımını nənəmizin yanına gətirmişdi. Nənəm də qızı yaxşı qarşılayıb. Nənəmə deyib ki, "mən qorxuram evə getməyə, anam hirslənəcək". Böyük oğlan idi, amma o vaxt hörmət, izzət var idi. Böyük-kiçik sayırdılar. Ata-anadan qorxurdular. Nənəm onu götürüb gəlib anamın yanına və anama deyib ki, "mənə görə heç nə demə, ağzını da açma". Biz həmin xanımı qəbul etdik. O, burada oxudu, universiteti bitirdi. Rus deyildi, Ukraynada doğulmuşdu" deyə o bildirib.
İradə xanım qardaşının xəstəliyindən də danışıb:
"Fransada qastrol səfərində olarkən infarkt olur. Sonra dili tutulur. O, nəsə demək istəyirdi, amma biz onu başa düşmürdük. Sağ əli işləmirdi, sol əli ilə nəsə yazırdı.
Yoldaşı onu çox yaxşı başa düşürdü. Hirslənirdi ki, biz bacıları onu başa düşmürük. Onun səhhətini başa çıxmaq üçün yanına gələnlərə də hirslənirdi. O, başa düşmürdü ki, o niyə danışa bilmir?! Ona elə gəlirdi ki, o, danışır, amma biz ona cavab vermirik. Bu tip xəstələrdə belə hallar yaşanır" deyə bacısı bildirib.
Nyus.Az
