Nyus.Az xəbər verir ki, Xalq artisti Flora Kərimova moderator.az-ın suallarını cavablandırıb.
- Flora xanım, öncə sizi salamlayıram. Uzun müddətdir sizi nə efirlərdə, nə də ki, saytlara müsahibə verərkən görürük. Bu nə ilə bağlıdır?
- Bu həm səhhətimlə, həm də həvəsimlə bağlıdır. Bir az həvəs, bir az da səhhət. Türkiyədəki zəlzələ də mənə çox pis təsir edib. Elə bir azərbaycanlı tanımıram ki, bu hadisələr ona mənfi təsir etməsin. Canımız, qanımız olan bir ölkənin başına bu cür oyun gələndə, adamın ürəyindən qara qanlar axır. Bütün telekanallardan Novruz çəkilişlərinə dəvət alsam da, qatıla bilməmişəm. Sizin zənginizdən öncə də məni dəvət etdilər. Dedim ki, vaxt verin düşünüm, həvəsim olsa gələrəm. Sözün düzünü deyim ki, həvəsim yoxdur.
- Həqiqətən də gözlərimiz hər zaman sizi axtarır.
- Oğlum, yadımdadır, sənətin qaynar vaxtlarında sənət də, sənətkarlar da var idi. Kimdənsə öyrənib, kiməsə öyrətmək həvəsi var idi. İndi sənət çox cılızlaşıb, həyat mürəkkəbləşib. Vallah mən o müğənnilərdə də bir təqsir görmürəm. Hamının başı ailəsinə qarışıb ki, onları dolandırsın. Ona görə də çətin olub. Gərək ya sənət seçəsən, ya da ki, ailə dolandırmaq yolunu. Düzdür, bu mənə aid deyil. Çünki mən oğlumla dövlətimizin himayəsindəyəm. Amma bununla belə də adamın ürəyi ağrıyır. Əvvəllər sənət yarışı var idi. İndi isə dedi-qodu, mərdimazarlıq, qeyri-peşəkarlıq vaxtıdır. Bacarmayan şəxs işdən bərk yapışır, problemlər də bundan sonra başlayır.
- Flora xanım, gözlərinizdə yaranan problemlə bağlı olaraq kök hüceyrə uzmanı Sevinc Heydərovanı məhkəməyə vermisiniz. Gözlərinizdəki problem çox ciddidir?
- Bəli, oğlum. Gözlərimdə assimmetriya yaranıb. Bundan başqa ptoz, yəni yuxarı göz qabağının sallanması baş verib. Tikişdən sonra göz qapaqlarının bir tərəfi sallanıb.
Onu məhkəməyə vermişəm, sona qədər də üstündə dururam. Sevinc Heydərova qeyri-peşəkar adamdır. Onun cərrahiyyə əməliyyatı etməyə ixtiyarı yoxdur. Mənim öz sənətim ginekoloqdur. Əməliyyat da etmişəm, bu işdən də başım çıxır. Mənim kömək etdiyim insanlar artıq Azərbaycanda da yaşamırlar. Uşaq qəbul edəndə Allahın köməyi ilə ona nəfəs verirdim. Sevinc Heydərova bunu bacarmır, bu onun peşəsi deyil. O sadəcə yaxşı pul qazanmaq istəyir. Heç cərrah da deyil, fizioloqdur. Hər şeyə əl atdı. Sonra da əl atdı kosmetik cərrahiyyəyə. Çox baha pul alır, əlinə düşəni də şikəst edir. Sevinc Heydərovanın yanında onu televiziyada reklam edənlər də durmalıdır. Çünki bizlər reklama inanırıq. O qədər tərifləyirlər ki, qazanırsınız, amma düşünmürsünüz ki, sizə inananlar bədbəxt olur?! Sevinc Heydərovanı əstağfurullah Allah edib qoydular ki, nədir-nədir kimsə reklamdan qazanacaq. Fizioloq olan bu şəxs kök hüceyrə etdi, sonra gəldi cərrahiyyəyə. Sənin cərrahiyədə nə işin var?! Cərrah saatsaz kimi dəqiq olmalıdır. Sevinc, sən reklama görə məni seçdin?! Bəli, onun reklamına tutarlı ad lazım idi. Siz mənim halımı görsəniz oturub ağlayarsınız. Ay Sevinc, bilmirsənki sən bu işdə məsuliyyət daşıyırsan?! Sənin ümumiyyətlə bu kök hüceyrədə qandığın nəsə var?! Kök hüceyrə artıq İtaliya, Amerika ölkələrində qadağadadır. Bu indi ayılıb, doğrayıb biçir. Bir hüceyrəyə 3500 azn pul götürürsən! Bu yaxınlarda da elan edəcəm ki, kim onun etdiyi əməliyyatlardan ziyan görübsə mənimlə əlaqə saxlasın. Nahaq yerə düşünürsən ki, kimsə sənə köməklik edəcək, himayədarlıq edəcək. Mən də mənəm! Ona görə yox ki, mən Flora Kərimovayam. Ona görə ki, etdiyin iş göz qabağındadır.
- Sənətkarlar çox duyğusal olurlar. Bu hallar onlara ikiqat çox pis təsir edir. Yəqin ki, həmçinin də sizə?
- Bu gün Atv kanalından da zəng etdilər, neçə vaxtdır əzizim Nanə məni verilişinə dəvət edir, "yox" deyirəm. Göz göz deyil ki, bu cür efirə çıxım! Bir müddət əvvəl eynəklə bir qəhrəmanımız haqda verilişə çəkildim. Buna məcbur idim. Rejissor dedi ki, "Flora xanım, eynəyinizi bəlkə çıxarasız?" Dedim ki, əgər eynəyimi çıxarsam, gərək Azərbaycandan çıxım gedim. Bütün verilişlərdən imtina edirəm, sən Sevinc utanmırsan?! Kök hüceyrəni əgər 3500-ə edirsənsə, o zaman mən gözlərim üçün səndən nə qədər almalıyam?! Onda mən səni mələtdirməliyəm də! Özü də mənə deyir ki, "gəlin sizə yenidən əməliyyat edim". Sən mənə əvvəldən nə etmisən ki, təzədən nəsə edəsən?! Bir dəfə yanmışam, bir dəfə də yanım?! Sənin adını çəkən artıq tövbə edir! Onu reklam edən adamla mən çörək kəsmişəm. Mən onu çox istəyirəm, onun birinci müsahibi olmuşam. Həmin şəxsin adını çəkmək istəmirəm. Ondan keçə bilmirəm, amma yenə də Sevinc məhkəmədə mənə cavab verəcək. Hər dəfə güzgüyə baxanda, hər dəfə efirlərdən zəng edib məni dəvət edəndə ürəyim dağa dönür!
Nyus.Az
