Xətai rayonunda Xalq artisti Niyaməddin Musayevin 85 illik yubileyinə həsr olunmuş görüş keçirilib
Nyus.Az xəbər verir ki, 03.09.2026-cı Xətai rayonu, Heydər Əliyev adına istirahət parkının amfiteatr səhnəsində “Qonağımız var” layihəsi çərçivəsində Xalq artisti, görkəmli müğənni Niyaməddin Musayevlə görüş keçirilib.
Xətai rayon İcra Hakimiyyəti, Bakı şəhər Mədəniyyət Baş İdarəsi, və Yeni Azərbaycan Partiyasının Xətai rayon təşkilatının birgə təşkilatçılığı ilə baş tutub.
Tədbirdə Xətai rayon İcra Hakimiyyətinin başçısı Rafiq Quluyev, Milli Məclisin deputatları Vüqar Rəhimzadə, Ziyad Səmədzadə, YAP Xətai rayon təşkilatının sədri Ramil Mirzəyev, rayon prokuroru Sərdar İmanov, rayon ağsaqqalları, şəhid ailələrinin üzvləri, qazilər və ictimaiyyət nümayəndələri iştirak ediblər.
Görüş Azərbaycan musiqi mədəniyyətinin inkişafında özünəməxsus xidmətləri olan Xalq artisti Niyaməddin Musayevin 85 illik yubileyinə həsr olunub.
Tədbirdə əməkdar artistlər Könül Kərimova, Nüşabə Ələsgərli, bəstəkar-müğənni Cabbar Nusayev, "Buta" rəqs qrupu və digər mədəniyyət və ictimaiyyət nümayəndələri iştirak ediblər. Çıxışlarda Niyaməddin Musayevin uzun illər ərzində Azərbaycan estrada sənətinin inkişafına verdiyi töhfələrdən, zəngin yaradıcılıq fəaliyyətindən və sənətkarlığından söz açılıb. Qeyd olunub ki, sənətkarın ifa etdiyi mahnılar uzun illərdir dinləyicilərin rəğbətini qazanaraq Azərbaycan musiqisinin dəyərli nümunələrinə çevrilib.
Görüşün sonunda Niyaməddin Musayev öz repertuarından sevilən mahnıları ifa edib. Sənətkarın çıxışı tədbir iştirakçıları tərəfindən böyük maraq və alqışlarla qarşılanıb.
Nyus.Az
