Bir neçə gün əvvəl gənc həkim, kardioloq Nurlana Əliyevanın (Nəbibəyli) qəfil vəfat etməsi ilə bağlı yeni detallar açıqlanıb.
Yaxın rəfiqəsi Mehriban Hüseynovanın sözlərinə görə, mərhumun bronxial astması olub və dekabrın 29-u gecə saatlarında səhhəti qəfil pisləşib. Məlumata görə, Nurlana Əliyeva qızını çağırıb və o, anasını yaxınlıqdakı “Medilux” Tibb Mərkəzinə aparıb. Lakin ailə üzvlərinin iddiasına əsasən, klinika tərəfindən qəbul edilməyib və Kliniki Tibbi Mərkəzə yönləndirilib. Bu hadisə insanlar tərəfindən birmənalı qarşılanmayıb və müəyən suallar yaradıb. Görəsən, “Medilux” Tibb Mərkəzi niyə xəstəni qəbul etməyib? Buna səbəb nə olub?
Məsələ ilə bağlı KONKRET.az “Medilux” klinikası ilə əlaqə saxlayıb. Klinikadan edilən açıqlamada bildirilib ki, mediada yayılan “pasiyentin qəbul edilməməsi” ilə bağlı məlumatlar həqiqətə uyğun deyil:
“26.12.2025-ci il tarixində, saat 16:06-da Baku Medical Plaza klinikalar şəbəkəsinin “Medilux” filialına Nurlana Əliyeva (Nəbibəyli) adlı pasiyent qəbul edilib. Onu klinikaya özünü pasiyentin qızı kimi təqdim edən Əliyeva Fidan adlı şəxs gətirib və məlumat verib ki, N.Əliyeva sirkə turşusu içib. Klinika tərəfindən Nurlana Əliyeva (Nəbibəyli) dərhal qəbul edilib və ona təcili ilkin tibbi yardım göstərilib. Aparılan ilkin tibbi qiymətləndirmə nəticəsində pasiyentə “uksusdan zəhərlənmə” diaqnozu qoyulub. Lakin pasiyentin vəziyyətinin təcili və ixtisaslaşmış tibbi müdaxilə tələb etdiyindən dərhal 103 Təcili Tibbi Yardım Xidmətinə məlumat verilib və N.Əliyeva müvafiq qaydalara uyğun şəkildə 103 TTY briqadasına təhvil verilib, ixtisaslaşmış stasionar tibbi müəssisəyə yönləndirilib. (Toksikoloji hallar zamanı pasiyentin ixtisaslaşmış stasionar tibbi müəssisəyə yönləndirilməsi mövcud tibbi protokollara uyğun olaraq zəruridir). Baku Medical Plaza Klinikalar şəbəkəsinin Medilux filiakı olaraq bildiririk ki, pasiyentin klinikaya qəbul edilməməsi ilə bağlı səsləndirilən iddialar həqiqəti əks etdirmir. Nurlana Nəbibəyli qeyd edilən tarixdə dərhal klinika tərəfindən qəbul edilib və lazımi ilkin tibbi yardım göstərilərək aidiyyatı üzrə istiqamətləndirilib. Baku Medical Plaza Klinikalar şəbəkəsi bütün pasiyentlərə qarşı etik normalara, tibbi protokollara və qanunvericiliyin tələblərinə uyğun fəaliyyət göstərir”, – deyə açıqlamada vurğulanıb.
Nyus.Az
