Goranboy rayonu, Nadirkənd kəndində qisas məqsədilə yandırılan tövlədə 230 baş xırdabuynuzlu heyvan tələf olub.
Nyus.Az Musavat.com-a istinadla xəbər verir ki, cinayəti törətməkdə şübhəli bilinən 3 nəfər həbs edilib.
Hadisənin baş verməsinə səbəb Bəhruz və Mahir adlı tanışlar arasında münasibətlərin pozulması olub. Belə ki, onlar birlikdə metal yığımı ilə məşğul olublar. Daha sonra bir-birlərindən şübhələnməyə başlayıblar. Bəhruz Mahirin onu aldatdığını düşünərək ondan qisas almağa qərar verib.
Bəhruz tanışı Cavid Allahverdiyevlə söhbət zamanı Mahirdən qisas almaq istədiyini deyib. Cavid ona Mahirin fermasını yandırmağı təklif edib. Bəhruz da bu təkliflə razılaşıb.
Bir gün sonra Cavid tanışı Erik Vəliyevlə birlikdə fermanı benzinlə yandırıblar. Bəhruz buna görə Cavidi 200 manatla "mükafatlandırıb".
İstintaqla müəyyən edilib ki, tövlənin yandırılması nəticəsində 230 baş xırdabuynuzlu heyvan məhv olub. Tövlənin dəyəri 5 000 manat, ümumi dəymiş ziyan isə 67 100 manat olaraq müəyyən edilib.
Zərərçəkmiş Mahir isə zərərin 70 000 manat olduğunu bildirib. Əlavə olaraq, 40 000 manatlıq itirilmiş gəlir kimi də qiymətləndirilməsini istəyib.
Bəhruz ifadəsində əməlini etiraf edib. Digər təqsirləndirilən şəxslər də özlərini təqsirli biliblər və barələrində yüngül cəza verilməsini istəyiblər.
Hökmə əsasən Cavid Allahverdiyev 5 il, Bəhruz 4 il 6 ay, Erik Vəliyev isə 4 il 6 ay müddətinə azadlıqdan məhrum ediliblər.
Nyus.Az
