Jurnalist vəsiqəsinin verilməsi və ya dəyişdirilməsi ilə bağlı ödəniş ləğv edilir.
Nyus.Az apa-ya istinadən xəbər verir ki, hazırda qüvvədə olan "Media haqqında" Azərbaycan Respublikası Qanununun 70.1-ci maddəsinə əsasən jurnalist vəsiqəsinin verilməsi və ya dəyişdirilməsi üçün ödənişin məbləği və həmin vəsaitdən istifadə qaydası tənzimlənir.
Bildirilib ki, "Media haqqında" Qanuna təklif edilən dəyişiklik layihəsinin 2.18.1.2-ci maddəsinə əsasən 70.1-ci maddədən "onun verilməsinə və ya dəyişdirilməsinə görə ödənişin məbləği və həmin vəsaitdən istifadə qaydası" ifadələrinin çıxarılması nəzərdə tutulur. Bu dəyişiklik qəbul olunacağı təqdirdə jurnalist vəsiqələrinin verilməsi və ya dəyişdirilməsi ödənişsiz həyata keçiriləcək.
Xatırladılıb ki, Milli Məclisin İnsan hüquqları komitəsinin bugünkü iclasında müzakirəyə çıxarılan "Media haqqında" Qanuna dəyişiklik layihəsinə əsasən Medianın İnkişafı Agentliyi və Audiovizual Şuranın əsasında Media və Yayım Şurasının yaradılması da təklif olunur.
Qeyd edək ki, hazırda jurnalist vəsiqəsinin verilməsi və ya dəyişdirilməsi üçün 20 manat ödəniş tələb olunur.
Nyus.Az
