“Nyus.az” saytı Masallı sakinlərinin verdikləri məlumata əsasən, 11 saylı Regional Meşə Təsərrüfatı Mərkəzinin (RMTM) Qəriblər meşəbəyliyinin 8 saylı dolayında "Park Masallı" adlanan ərazidə 2025-ci ildən elə oranın sahibi tərəfindən qurudulmağa başlamış 3 ədəd iridiametrli (96 sm, 108 sm, 110 sm) şabalıdyarpaq palıd ağacının kəsilməsi üçün saxta rəy alınması və 3 ağacın 3-nün də 20.04.2026-cı il tarixdə kəsilərək götürülməsi barədə informasiyanı paylaşmışdı. Məlumatda qeyd olunmuşdu ki, kəsilib götürülmüş ağacların yerlərinə gözdən pərdə asmaq üçün 3 ağac tingi əkilmişdir.
İnformasiya dərc olunandan sonra “Park Masallı” istirahət mərkəzinin sahibkarı Ağayev Əkbər Etibar oğlunun vəkili redaksiyamızla əlaqə saxlayıb təmsil etdiyi şəxsin məsələ ilə bağlı mövqeyini bildirdi. Məlum olmuşdur ki, 11 saylı RMTM hələ 2023-cü ilin avqust ayında sahibkarı məhkəməyə verərək, ondan meşə fondu torpağını boşaltmağı və əvvəlki vəziyyətə gətirərək təhvil verməsini tələb etmişdir. Masallı rayon məhkəməsi araşdırma apararaq müəyyən etmişdir ki, sözügedən ərazi meşə fonduna aid deyil, sahibkarın qanuni mülkiyyətindədir. Mülkiyyət hüququnu təsdiqləyən “Çıxarış” sənədi də mövcuddur. O üzdən Masallı rayon məhkəməsinin 2(050)-165/2024 saylı, 31.01.2024-cü il tarixli Qətnaməsi ilə iddia rədd edilərək, tələb təmin edilməmişdir.
Nyus.Az
