"Respublika Perinatal Mərkəzi"ində 7 körpənin öldüyü yanğınla bağlı ittiham olunan direktor və şöbə rəislərinin cinayət işi üzrə məhkəmənin növbəti iclası keçirilib.
Nyus.Az unikal.az-a istinadən xəbər verir ki, Bakı Ağır Cinayətlər Məhkəməsində hakim Leyla Əsgərova - Məmmədovanın sədrliyi ilə keçirilən proses zərərçəkən və vəkillərin təqsirləndirilən Mehriban Abasquliyevaya sualları ilə davam edib:
"Mən Perinetal mərkəzin rəhbərliyinə gələndə buradakı problemlərlə bağlı tanış oldum. Təhlükəsizliklə bağlı qüsurları TƏBİB-ə yönləndirdim. TƏBİB-ə iki dəfə yazılı, neçə dəfə də şifahi məlumat vermişəm. Siqnalizasiyanın özü 2009-cu ilin dekabrından, müəssisə açılandan işləmirdi. Mərkəzin rəhbərliyində çalışdığım 11 ay ərzində əlimdən gələni etmişəm ki, problemləri aradan qaldırım.
Mənim mərkəzin fəaliyyətini dayandırmaq, hansısa bir tibbi avadanlıq almağa (ancaq xırda maliyyə hesabı olan) səlahiyyətim yox idi, bu ancaq mərkəzləşmiş qaydada həyata keçirilirdi. Siqnalizasiyanın problemi ilə bağlı TƏBİB-ə bildirəndə mənə dedilər ki, növbəti ilin büdcəsində bu problem nəzərə alınacaq. Artıq 18 gün idi mərkəzdə işləyirdim ki, TƏBİB-in sədr müavini Vüqar müəllim gecə saat 12-yə qalmış şöbəyə gəldi. Tez ora getməyə hazırlaşırdım ki, mənə dedi ki, gəlmə, biz özümüz hər yeri gəzdik, yoxladıq. "Respublika Perinatal Mərkəzi" hazırda fəaliyyət göstərmir".
Daha sonra məhkəmə tərkibi sənədlərin tədqiqi mərhələsinə başladığını bildirib.
Məhkəmənin növbəti iclası aprelin 15-nə təyin edilib.
Xatırladaq ki, 2024-cü ilin yanvarın 9-da "Respublika Perinatal Mərkəzi" PHŞ-nin inzibati binasında yanğın baş verib. Yanğınla bağlı Baş Prokurorluqda Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.Bundan başqa, Mehriban Abasquliyevanın 27 dekabr 2022-ci il tarixdə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.
Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapeya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib. Eyni zamanda cinayət işi üzrə zərərçəkmiş qismində "Respublika Perinatal Mərkəzi", Elçin Gülmalı oğlu Nəcəfov, Vaqif İntiqam Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıb.
Nyus.Az
