Ötən gün Tusi Hospitalda fəaliyyət göstərən travmatoloq-ortoped Natiq Əhmədovun fəaliyyəti ilə bağlı ciddi iddialar redaksiyamıza daxil olub. Şikayətçi Günay Vahidovanın sözlərinə görə, 1958-ci il təvəllüdlü Vahidova Elmira Soltanməcid qızı ötən ilin 29 dekabr tarixində sol diz nahiyəsində ağrılarla bağlı həkimə müraciət edib. İddialara əsasən, həkim xəstəni klinikaya deyil, ev şəraitində müayinə edib və diz nahiyəsinə mənşəyi, tərkibi və istehsalçısı barədə heç bir məlumat təqdim olunmayan “gel” tətbiq edib.
Həmin müdaxilədən sonra xəstənin vəziyyəti ağırlaşıb, ağrılar artıb və hazırda o, sərbəst hərəkət etmək qabiliyyətini itirib.Azərbaycan Respublikasının “Əhalinin sağlamlığının qorunması haqqında” Qanununa əsasən,pasientə tətbiq olunan dərman və tibbi vasitələr barədə dolğun və aydın məlumat verilməlidir,tibbi xidmətlər müvafiq lisenziya və normativ tələblər çərçivəsində göstərilməlidir,həkim öz peşə fəaliyyətinə görə hüquqi məsuliyyət daşıyır.Mediatv.az xəbər verir ki, İnzibati Xətalar Məcəlləsi və Cinayət Məcəlləsi tibbi qaydaların pozulması, səhlənkarlıq və xəstəyə zərər vurulması hallarında məsuliyyət nəzərdə tutur. Əgər tətbiq olunan preparatın qeydiyyatı, sertifikasiyası və mənşəyi barədə sənəd yoxdursa, bu, artıq ayrıca hüquqi qiymət tələb edən məsələdir.
400 manatlıq “müalicə” – sənəd haradadır?
Şikayətçilərin bildirdiyinə görə, həkim tərəfindən göstərilən xidmət müqabilində 400 AZN ödəniş alınıb. Lakin rəsmi qəbz, tibbi protokol, epikriz və ya müdaxiləyə dair hər hansı sənəd təqdim edilməyib. Bu isə bir neçə sual doğurur,ev şəraitində aparılan tibbi müdaxilə hansı hüquqi əsasla icra olunub,xəstənin yazılı razılığı alınıbmı,fəsadların yaranmasına görə məsuliyyəti kim daşıyır?
Məsələ ilə bağlı artıq Səhiyyə Nazirliyinin qaynar xəttinə müraciət edildiyi bildirilir. Lakin təkcə şikayət kifayət deyil – araşdırma, ekspertiza və hüquqi qiymət verilməlidir.
Əgər iddialar təsdiqini taparsa, burada söhbət təkcə tibbi səhvdən deyil, həm də qanunvericiliyin kobud şəkildə pozulmasından gedir. İnsan sağlamlığı üzərində aparılan hər hansı qeyri-şəffaf və sənədsiz “təcrübə” cəzasız qalmamalıdır.
Görəsən vətəndaşın sağlamlığı bu qədər ucuz və nəzarətsiz ola bilərmi?
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
