Azərbaycan qanunvericiliyinə görə müəllimlərin də daxil olduğu bütün əmək münasibətləri Azərbaycan Respublikası Əmək Məcəlləsi ilə tənzimlənir. Bu məcəlləyə əsasən, əmək müqaviləsi yalnız müəyyən hüquqi əsaslar olduqda xitam verilə bilər.
Nyus.Az metbuat.az-a isinadla bildirir ki, müəllimlərlə bağlanan əmək müqaviləsi aşağıdakı hallarda dayandırıla bilər:
müəllimin öz təşəbbüsü ilə işdən çıxmaq istəməsi;
əmək müqaviləsinin müddətinin başa çatması;
tərəflərin qarşılıqlı razılığı;
müəssisənin ləğvi və ya ştat ixtisarı;
tərəflərin iradəsindən asılı olmayan hallar.
Bu hallar istisna olmaqla, müəllimin işdən çıxarılması qanunsuz hesab olunur.
Bəs işəgötürənin təşəbbüsü ilə işdən azad etmə hansı hallarda mümkündür?
Əmək Məcəlləsi işəgötürənə müəllimi öz təşəbbüsü ilə yalnız konkret əsaslar olduqda işdən azad etmək hüququ verir. Əgər müəllim əmək funksiyalarını yerinə yetirməz və ya vəzifə öhdəliklərini sistemli şəkildə pozarsa, əmək intizamına riayət etməzsə, işə davamlı gəlməzsə, daxili qaydalara əməl etməzsə, pedaqoji fəaliyyətlə uyğun gəlməyən davranışlara yol verərsə, şagirdlərin təhlükəsizliyini riskə atan və ya etik normaları kobud şəkildə pozan hərəkətlər edərsə, işəgötürən onunla bağlanan müqaviləyə xitam verə bilər.
Bu cür hallarda işdən çıxarılma yalnız rəsmi aktlar, izahatlar və intizam tədbirləri sənədləşdirildikdən sonra mümkün sayılır. Sadəcə şikayət və ya subyektiv yanaşma xitam üçün yetərli əsas hesab edilmir.
Qanunvericilik müəllimlərin əmək hüquqlarını da açıq şəkildə qoruyur. Əgər müəllim qanunsuz əsaslarla və ya prosedur pozuntusu ilə işdən azad olunarsa, o, məhkəməyə müraciət etmək və əmək hüquqlarının bərpasını tələb etmək hüququna malikdir.
Bu halda məhkəmə işəgötürənin qərarını ləğv edə, müəllimin işə bərpasına və itirilmiş əməkhaqqının ödənilməsinə qərar verə bilər.
Nyus.Az
