Məlum olduğu kimi, Xətai rayonunda 29.12.2025-ci il tarixdə rayon İcra Hakimiyyəti, YAP Xətai rayon Təşkilatı və C.Naxçıvanski adına Hərbi Liseyin birgə təşkilatçılığı ilə Dünya Azərbaycanlılarının Həmrəylik Günü və Yeni il münasibətilə Cəmşid Naxçıvanski adına Hərbi Liseydə bayram konserti təşkil olunub.
Tədbirdə Xətai rayon İcra Hakimiyyətinin başçısı Rafiq Quluyev, Milli Məclisin deputatları Vüqar Rəhimzadə, Pərvanə Vəliyeva, YAP Xətai rayon təşkilatının sədri Ramil Mirzəyev, Hərbi Liseyin rəhbərliyhi, müəllim heyəti və kursantlar iştirak ediblər.
Tədbirin bədii hissəsində Xalq artisti Röya Ayxanın iştirakı ilə bayram konserti təqdim edilib. Müğənninin ifasında səslənən sevilən mahnılar tədbir iştirakçıları tərəfindən böyük maraq və alqışlarla qarşılanıb, konsert iştirakçılara xoş bayram əhval-ruhiyyəsi bəxş edib.
Bayram proqramı milli-mənəvi dəyərlərin təbliği, gənc kursantlarda həmrəylik və vətənə bağlılıq ruhunun daha da gücləndirilməsi məqsədi daşıyıb.
Tədbirin bədii hissəsində Xalq artisti Röya Ayxanın iştirakı ilə bayram konserti təqdim edilib. Müğənninin ifasında səslənən sevilən mahnılar tədbir iştirakçıları tərəfindən böyük maraq və alqışlarla qarşılanıb, konsert iştirakçılara xoş bayram əhval-ruhiyyəsi bəxş edib.
Bayram proqramı milli-mənəvi dəyərlərin təbliği, gənc kursantlarda həmrəylik və vətənə bağlılıq ruhunun daha da gücləndirilməsi məqsədi daşıyıb.
Lakin xoşagəlməz haldır ki, Xalq artisti Röya Ayxanın Xətai rayon İcra Hakimiyyətində qarşılanması momentini əks etdirən görüntülər qabardılaraq rayon rəhbərliyi barədə tənqidi paylaşımlar diqqəti çəkir.
İddia olunur ki, guya heç qazilər Xətai RİH-nin başçısının qəbuluna düşə bilmədikləri halda müğənninin təmtəraqlı qarşılanması xoşagələn hal deyil.
RİH-dən verilən açıqlamada isə bildirilib: "Xalq artisti Röya Ayxan 31 dekabr - Dünya Azərbaycanlılarının Həmrəyliyi Günü və Yeni İl münasibətilə Xətai rayonu ərazisində yerləşən Cəmşid Naxçıvanski adına Hərbi Liseyin şagirdləri üçün konsert proqramı ilə çıxış edib. Tədbirdə icra başçısı, millət vəkilləri, şəhid və qazi ailələri və digər qonaqlar iştirak ediblər. Tədbirdən öncə Ulu Öndər Heydər Əliyevin memarı olduğu Liseyin muzeyi ziyarət olunub".
Fikir verdinizsə, açıqlamada sözügedən tədbirdə şəhid və qazi ailələrinin də iştirak etdikləri qeyd olunub. Bundan əlavə, qazilər yaxın keçmişin, hərbi liseyin şagirdləri isə gələcəyin hərbçiləridirlər. Yəni şəhidlərimiz və qazilərimiz, eləcə də digər Vətən müharibəsi iştirakçıları ölkəmizin ərazi bütövlüyünü bərpa ediblərsə, həmin əraziləri qorumaq vəzifəsi yetişməkdə olan gənc hərbçilər nəslinin üzərinə düşür. Başqa sözlə, bu müstəvidə gənc hərbçilərə diqqət elə onların sələflərinə diqqət deməkdir.
Ümumiyyətlə, torpaqlarımızın 30 illik işğaldan qurtulması ilə nəticələnən Vətən müharibəsində canlarını fəda etmiş şəhidlərimizin ailələri, qazilər, onların qayğı və problemləri Xətai rayon rəhbərliyinin diqqət mərkəzindədir. RİH başçısının yerlərdə keçirdiyi səyyar görüşlərdə və RİH-nin inzibati binasında təşkil olunan qəbullarda iştirak edən sakinlərin və həssas kateqoriyadan olan şəxslərin müraciətləri tək-tək dinlənilir. Müraciətlərin əsasını şəhid adının əbədiləşdirilməsi, mənzil uçotuna götürülmə, maddi yardımın göstərilməsi, fərdi yaşayış evinin təmiri, dərman preparatlarının verilməsi və digər məsələlər təşkil edir.
Səsləndirilən müraciətlərin bir çoxu yerindəcə öz həllini tapır, digərlərinin araşdırılaraq qanunamüvafiq formada həlli üçün adiyyətı üzrə tapşırıqlar verilir. Sakinlər, o cümlədən şəhid ailələri, qazilər əhalinin problemlərinin həll edilməsi məqsədilə yerlərdə həyata keçirilən tədbirlərə, göstərilən yüksək diqqət və qayğıya görə Azərbaycan Respublikasının Prezidenti İlham Əliyev və Birinci vitse-prezident Mehriban Əliyevaya minnətdarlıqlarını ifadə edirlər.
Onu da qeyd edək ki, Xətai rayonu ərazisində qeydiyyatda olan şəhid ailələri və Vətən müharibəsi əlilləri Xətai Rayon İcra Hakimiyyəti başçısının müvafiq Sərəncamları ilə mənzil növbəsinə götürülmüş və onlardan çoxu artıq mənzillə təmin olunmuşdur. Rayon İcra Hakimiyyətinin müraciəti əsasında xeyli sayda şəhid ailələri üzvləri və Vətən müharibəsi iştirakçıları işlə təmin olunmuşdur.
Xətai rayon İcra Hakimiyyəti başçısının tapşırığına əsasən rayonun şəhid ailələri ilə mütəmadi görüşlərin keçirilməsi davam edir. Şəhidlərin doğum günü ilə əlaqədar olaraq Xetai rayon İcra Hakimiyyətinin başçısı, İcra Hakimiyyətinin vəzifəli şəxsləri, rayondan seçilmiş millət vəkilləri, digər idarə və müəssisə rəhbərləri, şəhidlərin hərbçi yoldaşları və ailələri ilə birlikdə şəhidlərin məzarları ziyarət olunur və üzərlərinə gül dəstələri qoyulur. Cənab Rafiq Quluyev şəhid ailələrinə baş sağlığı verir və vətən üçün canından keçən övladların heç zaman unudulmayacağını bildirir. Bundan əlavə, ölkə rəhbərliyinin şəhid ailələrinə daimi diqqət və qayğısının olduğu və bunun davamlı olacağı ziyarət iştirakçılarının diqqətinə çatdırılır.
O ki qaldı Xətai rayon rəhbərliyinin rayonda başqa müstəvilərdə həyata keçirdiyi təqdirəlayiq işlərə, bunlar ayrı söhbətin mövzusudur və yəqin ki, 2025-ci ilin yekun göstəricilərinə dair tezliklə açıqlanacaq statistik məlumatlarda öz əksini tapacaqdır.
Şəhid ailələri və müharibə əlilləri Xətai RİH-nin diqqət mərkəzində saxladığı əsas məsələdir, ancaq yeganə məsələ deyil. Bayram və əlamətdar günlərdə rayon sakinlərinə xoş ovqat yaşadan qonaqları qarşılamaq da qabiliyyət tələb edir. Ucuz mövzularla cəmiyyətdə müzakirə açmaq cəhdləri isə çox vaxt vəzifəsini, içtimai mövqeyini və nüfuzunu itirmiş, qapısı qonaqsız qalmış, özü də qonaq çağırılmayan səbatsız sabiqlərin unudulmaq qorxusunun təzahürü kimi, yenidən gündəmə gəlmək istəyi kimi üzə çıxır.
Nisa Şirvanlı
Nyus.Az
