Xüsusilə ağır ittihamlarla üz-üzə qalan və hazırda ev dustaqlığında saxlanılan Prezident Administrasiyasının və Milli Elmlər Akademiyasının keçmiş rəhbəri Ramiz Mehdiyev özünə dövlət hesabına təyin olunmuş vəkildən imtina edib.
Nyus.Az xəbər verir ki, “Qafqazinfo”nun əldə etdiyi məlumata görə, 87 yaşlı “boz kardinal” bu qərarı tam şəxsi istəyi ilə verib və bildirilib ki, Mehdiyev müdafiəsinin yalnız özünün seçdiyi vəkillər tərəfindən aparılmasını istəyir. Bu səbəbdən təyinatla işə qoşulmuş vəkil Zaur Abiyevin xidmətindən rəsmən imtina olunub.
Maraqlıdır ki, məsələ ilə bağlı danışan Zaur Abiyev də yalnız qısa cavabla kifayətlənib: “Ramiz Mehdiyevin müdafiəsini həyata keçirmirəm”. Müdafiəçi əlavə suallara cavab verməkdən imtina edib.
"Boz kardinal" müdafiə taktikasına şəxsən nəzarət edir
Ramiz Mehdiyevin bu addımı onun istintaq prosesinə daha aktiv şəkildə müdaxilə etməyə başladığını göstərir. Bir müddət öncə yeni seçdiyi vəkillər vasitəsilə apellyasiya şikayətləri verməsi də bunu təsdiqləyirdi. Lakin Mehdiyevin Rusiyaya ünvanlandığı sensasion məktub üzə çıxdıqdan sonra həmin şikayətlər artıq “mənasız” hesab edilmiş və geri çəkilmişdi.
Mütəxəssislərin fikrincə, Mehdiyevin müdafiə qrupunu yenidən formalaşdırması, prosesə fərqli hüquqi strategiya ilə yanaşmaq niyyətindən xəbər verir. Hazırda istintaqın müxtəlif istiqamətlər üzrə genişləndiyi, Mehdiyevin isə suallara yalnız yeni komandasının iştirakı ilə cavab vermək istədiyi sezilir.
Dövlətə xəyanət, çevriliş cəhdi və çirkli pulların leqallaşdırılması – ağır ittihamlar qalır
Qeyd edək ki, Azərbaycanın siyasi tarixində “boz kardinal” kimi tanınan Ramiz Mehdiyev dövlətə xəyanət, hakimiyyəti zorla ələ keçirməyə cəhd və cinayət yolu ilə əldə edilmiş əmlakı leqallaşdırma maddələri ilə məsuliyyətə cəlb olunub.
Onun barəsində məhkəmənin qərarı ilə ev dustaqlığı qətimkan tədbiri seçilib. Eyni zamanda Mehdiyevin ailə üzvlərinin ölkədən çıxışına məhdudiyyət qoyulub. Bu isə istintaqın hələ davam etdiyini və qarşıdakı mərhələdə daha ciddi addımların atıla biləcəyini göstərir.
Yeni mərhələ başlayır
Ramiz Mehdiyevin təyinatlı vəkildən imtinası prosesin növbəti, daha aktiv və daha kəskin mərhələsinə keçidin anonsu kimi qiymətləndirilir. Onun hansı vəkillərlə çalışacağı və yeni müdafiə strategiyasının nədən ibarət olacağı isə yaxın günlərdə bəlli olacaq.//Musavat.com//
Nyus.Az
