Paytaxt və region bazarlarında ev quşlarının qiymətində son günlər ciddi artım müşahidə olunur. Xüsusilə hind quşu və qazın qiymətləri sürətlə artır. Satıcılar qiymət artımının 4-5 manat civarında olduğunu deyirlər.
Nyus.Az xəbər verir ki, hind quşunun qiyməti adətən yeni il ərəfəsində artır, lakin bu il qiymətlər artıq indi bahalaşmağa başlayıb. Rayonlarda son bir həftədə hind quşunun bir kiloqramının qiyməti 4-5 manat yüksəlib.
Satıcılar bildirirlər ki, iribuynuzlu heyvanlar arasında dabaq xəstəliyinin yayılması ev quşlarına tələbatı artırıb. Bu səbəbdən hind quşu ilə yanaşı qaz və ördək də bahalaşıb.
Məsələn, hind quşunun qiyməti əvvəl 14 manat idisə, indi 16-20 manat arasında dəyişir. Qazın kilosu 13-15 manat aralığında olsa da, bəzi bazarlarda 18 manatadək qalxıb. Ördəyin kilosu isə 14-16 manat civarındadır. Satıcılar xəbərdarlıq edirlər ki, yeni il yaxınlaşdıqca qiymət artımı qaçılmazdır və alıcılar bazarlara vaxtında müraciət etməlidirlər. /ATV
Nyus.Az
