"Counterpoint Research"-ün Qlobal Telefon Modeli Satış İzləmə Hesabatına əsasən, ən çox satılan 10 modelin tamamilə Apple və Samsung cihazlarından ibarət olduğu müəyyən edilib.
Nyus.Az xəbər verir ki, Apple-ın "iPhone 17" modeli 2026-cı ilin ikinci rübündə dünyanın ən çox satılan smartfonu olub. "Counterpoint Research" məlumatlarına görə, "iPhone 17" qlobal smartfon satış həcminin 6 faizini təşkil edib. "iPhone 17 Pro Max" ikinci, "iPhone 17 Pro" isə üçüncü sırada qərarlaşaraq Apple-a siyahının ilk üç pilləsini qazandırıb.
Apple və Samsung qlobal üzrə ən çox satılan 10 model siyahısına beş cihaz daxil ediblər. İlk 10 modelin ümumi satışlardakı payı 26 faizə çataraq iyun rübü üçün ən yüksək səviyyəyə yüksəlib. Bu nisbət illik müqayisədə 2 bənd artıb. Ümumi smartfon bazarı eyni dövrdə 11 faiz daralarkən, istehsalçıların qlobal RAM qıtlığı səbəbindən premium və yüksək həcmli modellərə daha çox diqqət ayırdığı qeyd olunub.
Apple-ın satışları 5 faiz artıb
Apple-ın ədəd bazasındakı satışları ikinci rübdə illik 5 faiz artıb. Şirkətin satışları Hindistan, Yaponiya və Orta Şərq-Afrika bölgəsində yüksələrkən, Cənubi Koreyada "iPhone" satışları "iPhone 17" seriyasının təsiri ilə təxminən iki dəfə artım göstərib.
"Counterpoint" bildirib ki, standart "iPhone 17" modelində edilən əsaslı təkmilləşdirmələr Pro modelləri ilə arasındakı fərqi daraldıb və modelin satışlarını dəstəkləyib. "iPhone 17 Pro" və "Pro Max" tərəfində isə dəyiş-təçil (trade-in) proqramları, kampaniyalar və daha əlçatan maliyyələşdirmə seçimləri premium tələbatı gücləndirib.
"iPhone 17e" modeli də "MagSafe" dəstəyi və əvvəlki illə eyni qiymətə daha yüksək yaddaş tutumu ilə ilk 10-luqdakı yerini qoruyub. Modelin xüsusilə ABŞ və Yaponiyada operator kampaniyaları sayəsində güclü tələbat gördüyü qeyd olunub.
Samsung-da "Galaxy S26 Ultra" ön plana çıxıb
Samsung cəbhəsində "Galaxy S26 Ultra" diqqət çəkib. Bu model brendin ikinci rübdə ən çox satılan telefonu olmaqla yanaşı, əvvəlki nəsli ilə müqayisədə sıralamada beş pillə irəliləyib. "Galaxy S26 Ultra", həmçinin iyun rübündə Android satışlarında lider olan ilk ultra-premium model olub.
"Galaxy S26 Ultra", "S26" seriyası satışlarının yarıdan çoxunu təşkil edib; məxfiliyə yönəlmiş ekran texnologiyası və təkmilləşdirilmiş süni intellekt xüsusiyyətləri modelin önə çıxan amilləri arasında göstərilib. Samsung-un artan xərclərə qarşı flaqman modellərə daha çox üstünlük verdiyi, promosyonları artırdığı və resurslarını bu seqmentlərə yönəltdiyi qeyd edilib.
"Galaxy A" seriyası ilk 10-luqdakı yerini qoruyub
Samsung-un "Galaxy A" seriyası isə uyğun qiymət, geniş əlçatanlıq və güclü qiymət-məhsuldarlıq balansı sayəsində ilk 10-luqdakı mövqeyini qoruyub saxlayıb. Siyahıdakı bütün "Galaxy A" modellərinin azı altı illik proqram təminatı dəstəyi təqdim etməsi də uzanan telefon dəyişdirmə dövrlərində mühüm üstünlük kimi önə çıxıb.(Milli.az)
Nyus.Az
