Səhər yeməyində yumurta və yulaf ən sağlam seçimlər arasında göstərilsə də, son illərdə aparılan araşdırmalar sadə qatığın xüsusilə bağırsaq sağlamlığı baxımından önə çıxdığını üzə çıxarır. Mütəxəssislərə görə, tərkibindəki probiyotiklər sayəsində sadə qatıq həzm sistemini dəstəkləyərir və uzun müddət tox qalmağa da kömək edə bilir.
Nyus.Az xəbər verir ki, alimlər qatığın meyvə, qoz və ya yulaf kimi liflə zəngin qidalarla birlikdə istehlak edildikdə həm bağırsaq mikrobiotasını dəstəklədiyini, həm də balanslı bir səhər yeməyi əmələ gətirdiyini bildirirlər. Buna görə də o, təkbaşına bir "möcüzəvi qida" olaraq deyil, sağlam səhər yeməyinin vacib hissələrindən biri kimi qiymətləndirilir.
"Nutrition Reviews" jurnalında dərc olunan və 100-dən çox elmi araşdırmanı qiymətləndirən sistemli icmal qatıq və digər fermentləşdirilmiş süd məhsullarının müntəzəm istehlakının bağırsaq sağlamlığı, çəki nəzarəti, 2-ci tip diabet riski və ürək-damar sağlamlığı baxımından müsbət təsirlərlə əlaqəli olduğunu ortaya qoydu. Tədqiqatçılar qatığın təkcə ehtiva etdiyi zülal və kalsiumla deyil, həm də canlı bakteriya kulturları sayəsində seçildiyini qeyd edirlər. Yaxın vaxtlarda dərc edilən digər bir araşdırmada isə 119 sağlam könüllü üzərində qatıq və yulaf istehlakının bağırsaq mikrobiotasına təsirləri araşdırılıb. Nəticələr qatığın faydalı bakteriya növlərini artırdığını və bağırsaq mikrobiotasında müsbət dəyişikliklər yarada bildiyini göstərib.
Ən çox fayda üçün şəkərsiz istehlak edilməsi tövsiyə olunur
Qidalanma mütəxəssisləri ətirləndirilmiş və əlavə şəkər ehtiva edən qatıqlar əvəzinə sadə qatığın seçilməsini məsləhət görürlər. Təzə meyvələr, qoz, badem, çia toxumu və ya yulaf ilə zənginləşdirilmiş sadə qatıq zülal, lif və sağlam yağları bir araya gətirərək daha balanslı bir səhər yeməyi təqdim edə bilər.
Mütəxəssislər həmçinin hər kəs üçün tək bir "ən sağlam səhər yeməyi" olmadığını vurğulayırlar. Yaş, sağlamlıq durumu və qidalanma vərdişlərinə görə ehtiyaclar dəyişə bilsə də, mövcud elmi məlumatlar sadə qatığın sağlam səhər yeməyi seçimləri arasında üst sıralarda yer aldığını göstərir. (Milli.az)
Nyus.Az
