
Ölkədə sahibkarlığın inkişafı, qeyri-neft sektorunun genişləndirilməsi və sahibkarlara əlverişli biznes mühitinin yaradılması dövlət siyasətinin əsas istiqamətlərindən biridir. Prezident İlham Əliyev dəfələrlə çıxışlarında sahibkarlara süni maneələrin yaradılmasının yolverilməz olduğunu, dövlət məmurlarının vəzifə səlahiyyətlərindən sui-istifadə etməməli olduğunu xüsusi vurğulayıb.
Lakin bəzi sahibkarların qarşılaşdıqları problemlər bu sahədə hələ də ciddi sualların mövcud olduğunu göstərir.
Nyus.Az-ın redaksiyasına müraciət edən sahibkar Cavanşir Novruzov Babək Rayon İcra Hakimiyyətində üzləşdiyi problemlərlə bağlı narazılığını ifadə edib. Sahibkarın sözlərinə görə, ona məxsus Babək rayonunun Badaşqan kəndində yerləşən, 9,6 sot torpaq sahəsində qeyri-yaşayış obyektinin tikintisi üçün bütün layihə sənədlərini hazırladaraq 15 aprel tarixində Babək Rayon İcra Hakimiyyətinə təqdim edib.
Məqsədi isə qanunvericiliyin tələblərinə uyğun şəkildə tikintiyə icazə almaq olub.
Lakin iddiaya görə, müraciətdən sonra aylar keçməsinə baxmayaraq, sahibkarın sənədlərinə müsbət və ya əsaslandırılmış mənfi cavab verilməyib.
“Mənə dedilər ki, hesabı vermədən sənədini ala bilməyəcəksən”
Cavanşir Novruzov bildirir ki, sənədlərini təqdim edərkən bəzi sahibkarlar ona Babək Rayon İcra Hakimiyyətində Ovni Muradovun razılığı olmadan heç bir sənədin verilməyəcəyini söyləyiblər. O isə əvvəlcə bu fikirlərə inanmadığını, məsələnin yalnız qanuni prosedurlar çərçivəsində həll olunacağına ümid etdiyini deyir.
Sahibkarın sözlərinə görə, dəfələrlə icra hakimiyyətinin rəhbərliyinin qəbuluna düşməyə çalışsa da, buna nail ola bilməyib. Daha sonra məktubla və teleqram vasitəsilə müraciətlər ünvanlayıb. Lakin iddia edir ki, bu müraciətlərinə də cavab ala bilməyib.
Nəhayət, çətinliklə Ovni Muradovun qəbuluna düşən sahibkar sənədlərinin niyə rəsmiləşdirilmədiyini soruşub.
Cavanşir Novruzovun iddiasına əsasən, həmin görüşdə ona belə bir cavab verilib:
“Vallah, səlahiyyətli nümayəndə razılıq verməyincə, biz heç bir iş görə bilmirik. Bu razılıq da elə-belə alınmır, yəqin ki, nəyi nəzərdə tutduğumu başa düşürsünüz”.
Sahibkar bildirir ki, bu sözlərdən sonra qarşı tərəfə Prezidentə müraciət edəcəyini söyləyib. Onun sözlərinə görə, Ovni Muradov şikayət etməməsini xahiş edərək 10 gün ərzində məsələni öz imkanları hesabına həll edəcəyinə söz verib.
Cavanşir Novruzov isə bu vədə inanaraq qəbuldan təşəkkür edib ayrıldığını bildirir.
Vəd verilən 10 gün keçdi, bəs sahibkarın sənədləri haradadır?
Sahibkarın sözlərinə görə, sonradan Ovni Muradovun Təhsil Nazirliyində vəzifəyə təyin edildiyini eşidib. Buna baxmayaraq, tikinti sənədləri ilə bağlı problem həllini tapmayıb.
O, bu yaxınlarda yenidən Ovni Muradovla telefon əlaqəsi saxlayaraq əvvəlki vədin yerinə yetirilmədiyini, ona inandığı halda nəticə əldə edə bilmədiyini bildirib.
Cavanşir Novruzovun sözlərinə görə, Babək Rayon İcra Hakimiyyətinə dəfələrlə müraciət etsə də, məsələ hələ də açıq qalır. İddia edir ki, icra hakimiyyətinin memarlıq sahəsində çalışan Hüseyn müəllimi də sənədlərin hazırlanması ilə bağlı ona konkret cavab verməyib və heç kimin ona müvafiq göstəriş vermədiyini bildirib.
Sahibkarın sözlərinə görə, ona əvvəllər müxtəlif şəxslər tərəfindən deyilən fikirlər indi daha ciddi suallar doğurur: görəsən, həqiqətən də hansısa razılıq olmadan sənədlərin rəsmiləşdirilməsi mümkün deyilmi? Əgər belədirsə, həmin razılığın hüquqi əsası nədir?
“Mən hələ buradayam, sabah üz-üzə gələcəyik” – bu sözlər nə demək idi?
Cavanşir Novruzov iddialarında daha bir məqama xüsusi diqqət çəkir. Onun sözlərinə görə, sonuncu telefon danışığı zamanı Ovni Muradov ona hazırkı müavinlə görüşərək məsələsini həll edəcəyini bildirib.
Sahibkar bundan belə qənaətə gəldiyini deyir ki, sənədlərinin rəsmiləşdirilməməsi ilə bağlı digər vəzifəli şəxslərə də hansısa göstəriş verilmiş ola bilər. Lakin bu iddianın təsdiqini tapması üçün aidiyyəti qurumların araşdırma aparması vacibdir.
O, həmçinin qəbul zamanı Ovni Muradovun dəfələrlə “Mən hələ buradayam, sabah üz-üzə gələcəyik, elə olsun ki, söz deyə biləsiniz” ifadəsini işlətdiyini bildirir.
Cavanşir Novruzov sonradan bu ifadələri təzyiq və hədə-qorxu xarakterli sözlər kimi qəbul etdiyini vurğulayır.
Aidiyyəti qurumlar bu iddialara aydınlıq gətirəcəkmi?
Ortaya bir sıra mühüm suallar çıxır:
Sahibkarın 15 aprel tarixində təqdim etdiyi sənədlər niyə indiyədək rəsmiləşdirilməyib?
Tikintiyə icazənin verilməməsinin konkret hüquqi səbəbi varmı?
Sahibkarın müraciətlərinə niyə vaxtında və əsaslandırılmış cavab verilməyib?
Ovni Muradovun adı ilə bağlı səsləndirilən iddialar nə dərəcədə əsaslıdır?
Babək Rayon İcra Hakimiyyətində sahibkarlıq fəaliyyəti ilə məşğul olmaq istəyən şəxslərin qarşılaşdığı problemlərə kim nəzarət edir?
Xüsusilə qeyd edək ki, sahibkarın səsləndirdiyi iddialar ciddi araşdırma tələb edir. Bu səbəbdən Babək Rayon İcra Hakimiyyətinin, eləcə də adı çəkilən şəxsin mövqeyini öyrənmək və məsələyə obyektiv aydınlıq gətirmək vacibdir.
Nyus.Az olaraq qarşı tərəfin mövqeyini dərc etməyə hazırıq.
Sonda sual yaranır: Dövlət sahibkarlara dəstək göstərdiyi halda, ayrı-ayrı məmurların yaratdığı iddia olunan süni maneələrə nə vaxt son qoyulacaq?
Hörmətlə,
Cavanşir Novruzov
Sahibkar


























