[/center]Xaricə ixrac edilən 578 milyon manat dəyərində kənd təsərrüfatı məhsulundan əldə olunan vəsaitləri ölkəyə qaytarmayan vəzifəli şəxslərdən birinə hökm oxunub.
1984-cü ildə Ağdam şəhərində anadan olmuş Hüseynov Gündüz İsmayıl oğlu Cinayət Məcəlləsinin 208.2.1, 208.2.2 (qabaqcadan əlbir olan bir qrup şəxs tərəfindən külli miqdarda xarici valyuta vəsaitini xaricdən qaytarmama) və 32.3, 308.2-ci (ağır nəticələrə səbəb olan vəzifə səlahiyyətlərindən sui-istifadədə təşkilatçı) maddələri ilə təqsirləndirilib.
Məhkəmə araşdırması zamanı müəyyən edilib ki, Gündüz Hüseynov direktoru olduğu “My Vegetables” MMC vasitəsilə 1 noyabr 2024-cü ilədək olan dövrdə 1279 gömrük bəyannaməsi üzrə kənd təsərrüfatı məhsullarını konsiqnasiya yolu ilə xaricə ixrac edib. Bu əməliyyatlar nəticəsində ümumilikdə 15 993 533.90 ABŞ dollarından (müvafiq məzənnə ilə 27 189 007.60 manat) artıq vəsait əldə olunub, lakin həmin pullar ölkəyə qaytarılmayıb.
Sahibkar bu cinayəti digər təqsirləndirilən şəxs – İmanov Röyal Mahir oğlu ilə birgə törədib. İstintaq materiallarına əsasən, o, iqtisadi dayanıqlılığın təmin edilməsi, valyuta bazarında tarazlığın qorunması, manatın nominal effektiv məzənnəsinin möhkəmlənməsi və inflyasiya təzyiqlərinin azaldılması istiqamətində dövlət siyasətinə zərər vurmaqla, qanunla qorunan mənafelərə ağır nəticələrə səbəb olan zərər yetirib.
Məlum olub ki, Gündüz Hüseynov bir neçə fərqli MMC yaradıb və onların direktoru kimi çıxış edib. O, bəzi şirkətlərin qanuni təmsilçiliyini Röyal İmanova həvalə edib. Lakin Röyal İmanov izahatında bildirib ki, Gündüz Hüseynov tərəfindən aldadılıb və öz xəbəri olmadan həmin şirkətlərin qanuni təmsilçisi edilib.
Məhkəmədə Gündüz Hüseynov törətdiyi əməldən səmimi peşman olduğunu deyib və barəsində yüngül cəza təyin olunmasını xahiş edib. Məhkəmənin hökmü ilə o, 2 il müddətinə sahibkarlıq sahəsində rəhbər və maddi məsul vəzifə tutmaq hüququndan məhrum edilməklə, 5 il müddətinə azadlıqdan məhrum edilib.
Qeyd edək ki, ötən ilin oktyabrında Baş prokuror yanında Korrupsiyaya qarşı Mübarizə Baş İdarəsinin apardığı araşdırmalar zamanı xaricə ixrac edilən 578 milyon manatlıq kənd təsərrüfatı məhsulundan əldə edilən vəsaitləri ölkəyə qaytarmayan vəzifəli şəxslər ifşa olunmuşdu.
İstintaqla müəyyən edilib ki, Məmmədov Tərlan Firuddin oğlu, Hüseynov Gündüz İsmayıl oğlu, Rezzahnicat Hafiz Malik oğlu, Əmrahov Elşən Bayram oğlu, İmanov Röyal Mahir oğlu, Nəsirov İntiqam Feyruz oğlu, Əlimərdanov Nicat Kərim oğlu və digərləri cinayətkar niyyətlə “Xaçmaz Aqro”, “Natural Fruit”, “Fresh Fruits Group”, “Global Trade Group”, “Garden Store”, “My Vegetables” və digər MMC-ləri təsis ediblər.
Onlar xarici ölkələrdə fəaliyyət göstərən şirkətlərlə müxtəlif kənd təsərrüfatı məhsullarının alqı-satqısına dair müqavilələr bağlayaraq ümumilikdə 340 milyon ABŞ dollarından artıq vəsaiti vəzifə səlahiyyətlərindən sui-istifadə etməklə, Azərbaycan banklarının hesabına qaytarmayıblar.
Araşdırma zamanı Binəqədi Rayon Məhkəməsinin qərarı ilə Tərlan Məmmədov, Gündüz Hüseynov və Hafiz Rezzahnicat barəsində həbs qətimkan tədbiri seçilib. Röyal İmanov, Elşən Əmrahov, İntiqam Nəsirov və Nicat Əlimərdanov barəsində isə polisin nəzarəti altına vermə növündə qətimkan tədbiri tətbiq olunub.
"Qaynarinfo"
Nyus.Az
