Son günlər heyvanlarda yayılmış dabaq xəstəliyi ilə bağlı ət məhsullarını satışına nəzarət güclənidirilib.
Bu istiqamətdə tədbirlərin tətbiqinə bir qədər gec başlansa da, istehlakçıların sağlamlığı ilə bağlı önəmli addımdır. Ancaq bu gün ət vətəndaşların istehlak etdiyi yalnız bir məhsuldur. Marketlərdə çoxsaylı ərzaq, idxal olunan orqanik olmayan kənd təsərrüfatı məhsulları satılır. Ancaq onların keyfiyyəti heç də ürəkaçan deyil. Məsələn, marketlərdə müxtəlif növ yağların satışına rast gəlmək mümkündür.
Mütəxəssislərin bir çoxu həmin yağların marqarin, soya yağlarının qarışığından hazırlandığını və hətta bir qisminin kərə yağı adı altında satışa çıxarıldığını desə də, bur istiqamətdə heç bir dəyişiklik müşahidə edilmir. Yəni indiyədək müvafiq qurumlar tərəfindən yağla bağlı yoxlama həyata keçirildiyi, satışdan çıxarılan məhsulun adı barədə məlumat verilməyib. Halbuki Bakıətrafı kəndləri gəzsələr, ziyanlı yağların istehsalı ilə məşğul olanları tapmaq mümkündür.
Bəzən məhsulun laboratoriyada yoxlatdırmasını məsləhət görülür ki, məlumata görə, bir kiloqram yağın yoxlanılması 80 manat təşkil edir. Bu isə həmin məhsuldan qat-qat bahadır. Bazarda, marketdə yoxlamaların nəticəsi barədə istifadəyə yararsız, keyfiyyətsiz məhsulların adlı siyahısı açıqlanmır. Bəzi marketlərdə isə tarixi keçən məhsulları “endirim kampaniyası” adı altında satışa çıxarırlar.
Hazırda ətlə bağlı reyd keçirilir və gigiyenik qaydalara riayət etməyən qəssabxanalar bağlanır. Ancaq marketlərdə ərzaqların keyfiyyəti ilə bağlı oxşar addımlar görmək mümkün deyil. Açıq şəkildə xarici məhsulların adı və dizaynı ilə məhsul bazara daxil olur. Tibb işçiləri isə bu gün ölkədə xəstəliklərin sayının artmasını məhz keyfiyyətsiz, orqanik olmayan qidaların istehlakı ilə əlaqələndirirlər.
Onlar sürətlə artan erkən ölümlər və epidemiya kimi yayılan müxtəlif, o cümlədən onkoloji xəstəliklərin kökünün məhz qeyri-sağlam qidalanma ilə bağlı olduğunu deyirlər. Bu baxımdan, insanların sağlamlığı üçün təhdidə çevrilən ərzaq məhsullarına ciddi nəzarəti təşkil etmək lazımdır.
Məsələ ilə bağlı “Azad İstehlakçılar” İctimai Birliyinin sədri Eyyub Hüseynov “Cebheinfo.az”-a bildirib ki, təhlükəsiz ərzaq həm də keyfiyyətsiz ola bilər:
“Ona görə biz daim deyirik ki, Azərbaycan Qida Təhlükəsizliyi Agentliyinin əsasnaməsində dəyişiklik aparılmalı, keyfiyyət önə çəkilməlidir. Çox təəssüf ki, bu problem yaşanır. Ölkədə AQTA-nın sənədi olmada marketlərə bir ərzaq daxil ola bilməz.
Lakin ara dükanları, küçə ticarəti var. Bunlarda da təhlükəli və daha keyfiyyətsiz ərzaqlar satılır. Dövlətin istehlakçı siyasəti bərbaddır, istehlakçı hüquqları qorunmur. Qanun 1995-ci ildə qəbul olunub və ondan sonra dəyişməyib. Belə bir şəraitdə də keyfiyyətsiz mallar bazara çıxarılır”.
Bir sözlə, hazırda qəssabxanalarda aparılan reydlərin marketlərdə də aparılmasına ciddi ehtiyac var. Yəqin ki, dəqiq yoxlamalar aparılarsa, o zaman qəssabxanalar kimi bir çox marketlərin də bağlanmasının şahidi ola bilərik.
Nyus.Az
