Moskvada münasibətləri daha da gərginləşdirənlərdən fərqli olaraq iqtisadi komanda əlaqələrin mühümlüyünü anlayır - səbəb
Rusiya baş nazirinin müavini Aleksey Overçuk jurnalistlərə bildirib ki, Rusiya və Azərbaycan arasında iqtisadi əməkdaşlıq iki ölkə üçün “çox vacibdir” və münasibətlərin yaxşılaşdırılması istiqamətində işlər aparılır.
“Biz hökumətlərarası komissiya keçirdik və iqtisadi sahədə hər ikimiz qeyd etdik ki, əməkdaşlığımız inkişaf edir. Və Rusiya ilə Azərbaycan arasında mövcud olan əməkdaşlıq ölkələrimiz üçün çox vacibdir. Və biz bu münasibətləri yaxşılaşdırmağa çalışırıq”, - TASS Overçukdan sitat gətirir.
Rusiya baş nazirinin müavini Azərbaycanla iqtisadi əlaqələrin inkişafı haqda həmişə müsbət dəyərləndirmələr verən məmurlardandır. Overçuk siyasi gərginliyin davam etdiyi zamanda Azərbaycanla iqtisadi əlaqələrin inkişafından danışır və hətta iqtisadi əlaqələrin kəsilməsi barədə bəzi qızışdırıcı çağırışlara baxmayaraq, hökumətin Azərbaycanla iqtisadi münasibətləri pozmaqda maraqlı olmadığnı bəyan edib.
Yada salaq ki, bu yaxınlarda Həştərxanda Azərbaycan və Rusiya arasında iqtisadi əməkdaşlıq üzrə Hökumətlərarası Komissiyanın 23-cü iclası keçirilib. İclasda Azərbaycan-Rusiya iqtisadi əməkdaşlığının müxtəlif istiqamətlərdə mövcud vəziyyəti və inkişaf perspektivləri müzakirə olunub, investisiyalar, sənaye, nəqliyyat-tranzit və digər sahələrdə həyata keçirilən birgə layihələr nəzərdən keçirilib.
İclasın yekunlarına dair Ş.Mustafayev və A.Overçuk Azərbaycanla Rusiya arasında iqtisadi əməkdaşıq üzrə Hökumətlərarası Komissiyanın 23-cü iclasının Protokolunu imzalayıblar. Belə görünür ki, Kremlin hazırkı vəziyyətə uyğun siyasi kursunu dəstəkləyərək Azərbaycanla münasibətləri daha da gərginləşdirənlərdən fərqli olaraq iqtisadi komanda əlaqələrin mühümlüyünü anlayır. Əlbəttə, əgər Kremldən iqtisadi əlaqələri böhrana soxacaq tapşırıq gələrsə, Overçuk və onun kimi düşünən iqtisadi komanda üzvləri heç bir müqavimət göstərə bilməzlər. Amma hələ ki Rusiya-Azərbaycan əlaqələrinin iqtisadi müstəvidə davamı gələcək üçün optimist perspektiv yaradır.
Yeri gəlmişkən, Rusiya Dövlət Dumasının Beynəlxalq məsələlər komitəsinin sədr müavini Aleksey Çepa da Moskva-Bakı münasibətləri ilə bağlı diqqətçəkən açıqlama verib. Deputat bildirib ki, bütün çətinliklərə baxmayaraq, Rusiya və Azərbaycan arasındakı dostluğun bərpası labüddür. Onun sözlərinə görə, iki ölkə arasında əməkdaşlıq qarşıdurmadan qat-qat daha faydalıdır, xüsusilə də iqtisadi sahədə: “Dostluq münasibətlərinin və iqtisadi maraqların inkişaf perspektivləri çox böyükdür. İstənilən halda istiləşmə qaçılmazdır - bu, sadəcə, zaman məsələsidir. Sual yaradan məqamlar var, amma yavaş-yavaş hamısı həll ediləcək”.
Xatırladaq ki, son aylarda Azərbaycan-Rusiya münasibətləri “soyuq müharibə”ni xatırladır. Bakı ilə Moskva arasında gərginlik dərinləşir, informasiya savaşı və qarşılıqlı ittihamlar güclənir. Bu mənzərədə Çepanın “qaçılmaz istiləşmə” barədə bəyanatı heyrətamiz açıqlama kimi görünür.
Çingiz Qənizadə
Demokratiya və İnsan Hüquqları Komitəsinin sədri Çingiz Qənizadə Rusiyanın ikibaşlı siyasətini İranla müqayisə edib. Onun fikrincə, cənub qonşumuzda da hökumət səviyyəsində isti açıqlamalar səslənir, mühafizəkar qanad Azərbaycana şər-böhtan, təhdid yağdırmaqdan əl çəkmir: “Şimal qonşumuz müttəfiqindən fərqlənmir. Bu da onu göstərir ki, Rusiyada anti-Azərbaycan dairələr var. Onlar gərginliyin daha da artmasına çalışırlar, ticarət dövriyyəsinin əhəmiyyətini vurğulayanlar isə buzların əriməsini istəyirlər. Elə bu günlərdə məlum oldu ki, Rusiya ticarət dövriyyəmizdə dördüncü yerdən üçüncü pilləyə yüksəlib. Yəni münasibətlərin gərgin dövrünə baxmayaraq, iqtisadi əlaqələr, yükdaşımalar inkişafdadır. Sadəcə, Overçuk, Çepa və digərləri günahı daxildə axtarmalıdırlar. Onlar Kreml rəhbərliyinə məruzə etməlidirlər ki, son vaxtlar bir az da sərtləş ritorikanın səbəbləri hansılardır. Məsələn, Solovyov və onun kimi Kreml təbliğatçıları dayanmırlar. Rusiyanın Telegram kanalları susmur. Ona görə də Rusiya rəhbərliyi "dur" əmri verməlidir".
Ç.Qənizadə Azərbaycanın Ukraynadakı enerji obyektlərinə hücumlardan sonra münasibətlərin daha da pisləşdiyini müşahidə edir: “Bu problem siyasi rəhbərliklərin danışıqları nəticəsində axarına düşə bilər. İndiki halda, ayrı-ayrı hökumət üzvlərinin təşəbbüsləri ilə məsələnin köklü həllini gözləmirəm. Ola bilsin ki, müəyyən yumşalma olsun, amma fundamental şəkildə yoluna düşməsi üçün dövlət başçılarının dialoqu olmalıdır. Azərbaycan isə tələblərində və tənqidlərində haqlıdır. Rusiya nə zaman yekəxanalığı kənara qoyacaq, vurulan təyyarəyə görə açıq üzrxahlıq edəcək, təzminat ödəyəcək, onda yumşalma qaçılmazdır. Təyyarənin vurulmasının bir ilinə təxminən 4 ay qalıb və Rusiya İstintaq Komitəsindən səs-səmir yoxdur”.
Samir Əsədli
Vətəndaş Həmrəyliyi Partiyasının sədr müavini Samir Əsədli isə Bakı-Moskva münasibətlərində dərinləşən böhranın bir müddət sonra həll olunacağını gözləyir. Onun bildirdiyinə görə, hazırda qeyri-rəsmi danışıqların getdiyi hiss olunur: “Rusiya istəyir ki, heç nə olmamış kimi əlaqələr davam etsin. Yəni qaldığımız yerdən münasibətlərimizi inkişaf etdirək. Zaxarova və Peskov bu səbəbdən ehtiyatlı açıqlamalar verir. Ancaq əvvəlki səviyyədə münasibətlər real görünmür. Bəli, böhran aradan qalxacaq, sadəcə, təyyarə vurulana qədər olan əlaqələri görməyəcəyik. Çünki ortalıqda başqa reallıqlar da var - Azərbaycanla Ermənistan sülh sənədini Moskvanın iştirakı olmadan paraflayıb, Zəngəzur dəhlizinin Rusiyanın nəzarətində olmadan açılması razılaşdırılıb...
Bütün bunlar Kremlin Cənubi Qafqazda təsirlərini xeyli dərəcədə azaldan faktorlardır. Overçuk və digər hökumət rəsmiləri isə yeni yaranan bu reallığı dərk etdiklərinə görə iqtisadi sahədə əlaqələrin inkişaf etdirilməsinə çağırırlar. Onlar anlayırlar ki, mövcud vəziyyət bundan ibarətdir, yəni böhranın dərinləşməsi, Azərbaycana təzyiqlərin gücləndirilməsi nəticə verməyəcək. Kremldəki qüvvələr də hökumət kimi praqmatik düşünməyə məhkumdurlar".
“Yeni Müsavat”
