[/center]Qaçqınlar və Məcburi Köçkünlərin İşləri Üzrə Dövlət Komitəsinin Mənzil İstismar Departamenti bir müddət əvvəl təmir işləri ilə bağlı tender elan etmiş, qalibi də “Victory Construction Group” şirkəti olmuşdu. Bu şirkətlə 739 min 935 manatlıq müqavilə imzalanmışdı.
Bizimyol.info xəbər verir ki, müqavilədə Bakı şəhəri, Ağcabədi, Goranboy və Füzuli rayonlarında salınmış məcburi köçkün qəsəbələrində binaların dam örtüyünün, fərdi yaşayış evlərinin və mənzillərin təmiri işləri nəzərdə tutulurdu.
Tenderdə qalib gələn şirkət də öz növbəsində “Construction Group of Pearl” MMC ilə Bakıda, Ağcabədidə və Füzulidə məcburi köçkün qəsəbələrində binaların dam örtüyünün, yaşayış evlərinin və mənzillərin təmiri ilə bağlı 262 min 562 manat bir, 227 min 439 manatlıq da bir subpodrat müqavilələri imzalayıb.
“Qaçqınkom” üçün işlər görmüş “Construction Group of Pearl” MMC-ni Dövlət Vergi Xidməti “riskli vergi ödəyicisi” kimi qiymətləndirib. Onunla əməkdaşlığa görə şirkəti də cəzalandıraraq, 79 min 826 manat əlavə vergi hesablayıb.
İqtisadiyyat Nazirliyi yanında Dövlət Vergi Xidmətinin Lokal Gəlirlər Baş İdarəsi tərəflər arasında elektron qaimə fakturaları əmtəəsiz və ya riskli əməliyyatların rəsmiləşdirildiyi sənədlər hesab edib. Mənfəət vergisi bəyannaməsində xərc sənədi kimi nəzərə almayıb. Həmçinin ƏDV-nin əvəzləşdirilməsinə əsas vermədiyini hesab edərək, şirkətə əlavə vergi məbləği hesablayıb. Bunu da həmin fakturaları təqdim edən şirkətin “iskli vergi ödəyicisi” hesab edilməsi ilə əsaslandırıb.
Şirkət isə bununla razılaşmayaraq bildirir ki, onlar “Qaçqınkom”un işlərini 2023-cü ildə götürüblər, adıçəkilən MMC isə 2024-cü ildə “riskli vergi ödəyicisi” hesab edilib: “Müqavilə bağlanılarkən qarşı tərəfin riskli vergi ödəyicisi olub-olmaması araşdırılıb, risk meyarı daşımadığı üçün müqavilə bağlanılıb, işlər yerinə yetirilib”.
Tələb olunan əlavə verginin silinməsi üçün şirkət Dövlət Vergi Xidmətinə qarşı məhkəmədə iddia qaldırıb. İddia təmin olunub. Lakin vergi orqanı bu qərardan narazı qalaraq, apellyasiya şikayəti verib.
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
