Bakı Apellyasiya Məhkəməsinin İnzibati Kollegiyası (hakim Rəşid Səmədovun sədrliyi və hakimlər- Xəyalə Cəmilovanın və Şirazi Eldarzadənin iştirakı ilə) «Təzadlar» qəzeti redaksiyasının Dövlət İmtahan Mərkəzinin informasiya sorğusunu cavablandırmaması kimi qanunsuz hərəkətindən verdiyi şikayətə baxan Bakı İnzibati Məhkəməsinin (hakim Orxan Həsənov) 14 fevral 2025- ci il tarixdə qəbul etdiyi qanunsuz qərardadından verilmiş apellyasiya şikayətinə baxdı. Məhkəmə kollegiyası Bakı İnzibati Məhkəməsinin (hakim Orxan Həsənov) 14 fevral 2025- ci il tarixli qərardadını qüvvədə saxladı.
Beləliklə, Bakı Apellyasiya Məhkəməsinin İnzibati kollegiyası da (hakim Rəşid Səmədovun sədrliyi və hakimlər- Xəyalə Cəmilovanın və Şirazi Eldarzadənin iştirakı ilə) bir daha sübut etmiş oldu ki, sən demə, 2 ilə 4 illik universiteti bitirib ali təhsil diplomu alaraq bunun da əsasında başqa bir universitetdə ikinci ali təhsil alıb icra başçısı olmaq mümkündür!
***
Beləliklə, Dövlət İmtahan Mərkəzinə sorğu verilib ki, İsmayıllının icra başçısı Nahid Bağırov özü tərəfindən yaydığı rəsmi anget sorğusunda yazır ki, 1999-cu ildə ABU-nun hüquq fakültəsini bitirib. Sonra bu ali təhsil sayılan diplom əsasında Bakı Dövlət Universitetinin Beynəlxalq Hüquq Fakültəsini bitirmişdir və s.
Xatırladırıq ki, Azərbaycan Beynəlxalq Universiteti Azərbaycan Respublikası Nazirlər Kabinetinin 11 oktyabr 1997-ci il tarixli, 204s saylı qərarı ilə qeydiyyatdan keçərək özəl ali məktəb statusu almışdır. Universitet, həmçinin Ədliyyə Nazirliyinin 17 oktyabr 1997-ci il tarixli 15 saylı şəhadətnaməsini alaraq dövlət qeydiyyatından keçmişdir. 1998-ci ildə Təhsil Nazirliyinin 04.12.1997-ci il tarixli 48–11–4058/16 nömrəli qərarı ilə ilk dəfə, 1999-cu ildə 6 il müddətinə, 2005-ci ildə isə 5 il müddətinə fəaliyyəti üçün yenidən lisenziya almışdır. Universitetdə bakalavr hazırlığı üçün 4 il vaxt norması nəzərdə tutulmuşdur. N.Bağırov RİH-nin rəsmi məlumat lövhəsində isə yazır: «Bağırov Nahid Rza oğlu: 4 aprel 1979-cu ildə Bakı şəhərində anadan olub, orta təhsilini Bakı şəhəri 242 və 151 saylı məktəblərdə alıb. 1999-cu ildə Azərbaycan Beynəlxalq Universitetinin Hüquq fakültəsini, 2006-cı ildə isə Bakı Dövlət Universitetinin Beynəlxalq Hüquq Fakültəsini bitirmişdir».
Göründüyü kimi, N.Bağırov 1997-ci ildə fəaliyyətə başlamış ABU-nu (bildiyimiz qədər həmin dövrdə orada hüquq fakültəsi də yox idi) 2 ilə-1999-cu ildə bitirmişdir. Hansı ki, Nazirlər Kabinetinin və Ədliyyə Nazirliyinin qərarında ABU-da bakalavr təhsilin müddəti 4 il nəzərdə tutulmuşdur. Elə isə, şəxsə 2 ilə ali təhsil diplomu necə verilə bilərdi? Və redaksiya informasiya sorğusunda DİM-dən xahiş etmişdi ki, ya ABU-da 2 illik alli təhsilin olmasını təsdiqləsin, ya da N.Bağırovun yaydığı bu məlumatı təsdiqləsin.
Beləcə, indi, necə deyərlər, bir dəli bir quyuya daş atıb, indi yüz ağıllı onu necə çıxarmaq barədə baş sındırır. Məhkəmələr və DİM də qalıb bir sadə sualın qarşısında aciz!!!
Məleykə Abbaszadə isə Avropa Məhkəməsinə şikayət verməyimizi istəyirsə…
Elə isə, gəlin bir sadə suala cavab tapaq: N.Bağırovun özü tərəfindən ictimailəşdirilmiş məlumatın təsdiqi üçün daha nə lazımdır? Adətən jurnalistlər məhkəməyə verilir ki, niyə qarşı tərəfi dinləməmisiniz, sorğu verib cavab almamısınız? İndi sorğu veririk, DİM rəhbəri hörmətli Məleykə Abbaszadə min cür əsassız bəhanələrlə cavab vermir, o da, hakimlər də icra başçısının bu müəmmasına şərik çıxırlar! Demək, Məleykə Abbaszadə və hakimlər redaksiyanı qanunsuz məhkəmə qərarlarından Avropa Məhkəməsinə şikayət verməyə məcbur edirlər.
Bəlkə bir az da səbrli davranıb bir suala da cavab axtaraq: Nahid Bağırov İsmayıllıya icra başçısı təyin ediləndən 1 ay sonra ölkə tarixində ilk dəfə Prezident Sərəncamı ilə Töhmət aldı! Bu azmış kimi, sonradan məlum olur ki, DTX-də yoxlanılan, Prezident Administrasiyasında araşdırılan sənədlərin içində heç kim 2 ilə ABU-nu bitirib ali təhsil diplomu almağın sirrini bilməyib???
Sonuncu suala cavab tapaq: bəs bu təqdimatı kim yazıb və Prezidentə bu sənədlər toplusunu kim təqdim edib???
Bu və ya digər suallara tezliklə cavab tapılacağına əminik. Çünki redaksiya Bakı İnzibati Kollegiyasının bu günkü qərardadını qəbul edən hakimlərdən Məhkəmə Hüquq Şurasına, eləcə də Nahid Bağırovun şəxsi işindəki müəmmalar barədə Prezidentə müraciət yazacaq.
Yəni, ölkədə hüquqi islahatlardan, hakim ədalətindən söhbət getdiyi bir vaxtda məhkəmələr bu boyda qanunsuzluğa göz yumursa və Prezidentin imzaladığı, Milli Məclisin qəbul etdiyi “Media haqqında” qanunu tanımırlarsa, daha sözümüz yoxdur. “Təzadlar”
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
