Azərbaycan BMT-nin Nyu-Yorkdakı mənzil-qərargahında keçirilmiş yan tədbirdə qadınların gücləndirilməsi və kiçik və orta bizneslərin yaşıl keçidə uyğunlaşması mövzusunu müzakirəyə çıxarıb, həmçinin mərasimdə Azərbaycanın sosial-iqtisadi inkişafı və işğaldan azad edilmiş ərazilərdə həyata keçirilən yenidənqurma işləri barədə məlumat verilib.
Bu barədə “Report”un ABŞ bürosu xəbər verir.
BMT-nin Nyu-Yorkdakı Baş Qərargah binasında Qadınların Statusu Komissiyasının (CSW69) 69-cu sessiyası çərçivəsində Azərbaycanın ev sahibliyi ilə yan tədbir keçirilib. Dəyirmi masa “Bakı İqlim Koalisiyası – KOB-ların Yaşıl Keçidi: Qadınların Gücləndirilməsi” mövzusunda təşkil olunub.
Tədbir Azərbaycan Respublikasının Kiçik və Orta Biznesin İnkişafı Agentliyi (KOBİA), İslam Əməkdaşlıq Təşkilatının (İƏT) İslam Ölkələri üzrə Statistik, İqtisadi və Sosial Tədqiqat və Təlim Mərkəzi (SESRIC) və BMT-də İslam Əməkdaşlıq Təşkilatının Daimi Nümayəndəliyinin birgə təşkilatçılığı ilə baş tutub.
Dəyirmi masada İslam Ölkələri üzrə Statistik, İqtisadi və Sosial Tədqiqat və Təlim Mərkəzinin (SESRIC) baş direktoru, Türkiyənin keçmiş ailə, əmək və sosial xidmətlər naziri Zəhra Zümrüt Selçuk, Azərbaycanın BMT yanında daimi nümayəndəsi səfir Tofiq Musayev, KOBİA-nın İdarə Heyətinin sədr müavini Rüfət Atakişiyev, Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva, dünya təşkilatının Cənub-Cənub Əməkdaşlıq İdarəsinin (UNOSSC) direktoru Dima Al-Xatib, İslam Əməkdaşlıq Təşkilatının BMT-də daimi müşahidəçisi səfir Hamid Ajibaiye, BMT qurumlarının və ECOSOC-a akkreditə olunmuş qeyri-hökumət təşkilatlarının (QHT) nümayəndələri iştirak edib.
Dəyirmi İslam Ölkələrinin Statistika, İqtisadi və Sosial Tədqiqat və Təlim Mərkəzinin təmsilçisi Atilla Karamanın moderatorluğu ilə keçirilib.
Tədbirdə çıxış edən Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva bildirib ki, Azərbaycanın 2030-cu ilədək sosial-iqtisadi inkişafa dair beş milli prioritetindən biri “Təmiz Ətraf Mühit və Yaşıl Artım Ölkəsi” kimi müəyyən edilib.
O, mərasim iştirakçılarına işğaldan azad edilmiş ərazilərdə aparılan yenidənqurma işləri və bölgənin yaşıl enerji zonasına çevrilməsi istiqamətində həyata keçirilən konkret tədbirlərdən bəhs edib: “1990-cı illərin əvvəlində müstəqilliyini qazandıqdan sonra Azərbaycan işğala və təcavüzə məruz qaldı. 30 il davam edən münaqişənin həllindən sonra ölkəmiz suverenliyini və ərazi bütövlüyünü bərpa edərək minlərlə vətəndaşın doğma torpaqlarına qayıtmasına şərait yaradıb. Azərbaycan işğaldan azad edilmiş ərazilərdə yaşıl enerji zonası yaratmaqla bölgədə ağıllı şəhər və ağıllı kənd konsepsiyaları əsasında yeni yaşayış məntəqələri inşa edir”.
Aparat rəhbəri qeyd edib ki, ötən il Azərbaycanda “Yaşıl dünya naminə həmrəylik ili” elan edilib.
C. Rəhmətullayeva Ailə, Qadın və Uşaq Problemləri üzrə Dövlət Komitəsi tərəfindən hazırlanmış Gender Bərabərliyi üzrə Milli Fəaliyyət Planı çərçivəsində qadınlar üçün iqtisadiyyat və idarəetmə sahələrində təlimlərin keçirildiyini vurğulayıb. O həmçinin ölkədə insan kapitalının inkişafına yönəlmiş siyasət nəticəsində qadınların cəmiyyətə və dövlət işlərinə daha fəal şəkildə inteqrasiya olunduğunu xüsusi qeyd edib: “Hazırda Azərbaycanda qadınlar ümumi işçi qüvvəsinin 48 %-ini, qadın sahibkarlar isə 23 %-ini təşkil edir”.
Nyus.Az
