Bir neçə gün bundan öncə Nyus.Az xəbər portalında Nəsimi Dövlət Yol Polisinin yarıtmaz fəaliyyəti haqda tənqidi məqalə yayımlayıb, bu rayonun bəzi ərazilərində, ələlxüsus “Azərbaycanın Milli Qəhrəmanı” Eldar Tağızadənin adını daşıyan küçə ilə, Süleyman Rüstəm küçəsinin kəsişməsində baş verən qanunsuzluqlarla bağlı geniş ictimaiyyəti məlumatlandırmışdıq. Yəni, yazıb qeyd etmişdik ki, Nəsimi rayonunun bəzi ərazilərində tüğyan edən hər cür anarxiyanın və qanunsuzluqların həddi-hüdudu bilinmir. Hətta, rayonun “Şamaxinka” adlanan ərazisində yaşanan biabırçılıqlarla bağlı rəhbərliyə sual verib cavab əldə etmək istədikdə o, “Biz niyə tədbir görməliyik, həmin ərazidə qayda-qanun yaratmağı Bakı şəhər Dövlət Yol Polisi həyata keçirməlidir. Odur ki, onlar zəhmət çəksinlər də, qeyd olunan ərazidəki problemləri aradan qaldırsınlar” deyə cavab verir. Bəli, Nyus.Az xəbər portalında “Nəsimi DYP şöbəsi rəhbərliyinin ”əndrabadi əməlləri” başlıqlı tənqidi məqaləni yayımladıq, amma buna baxmayaraq Nəsimi Dövlət Yol Polisinin rəhbərliyindən, yaxud da hansısa əməkdaşından yeni bir addımın atılmasının heç də şahidi olmadıq. Belə ki, şöbə rəisi və onun əməkdaşları baş verən hər cür qanunsuzluqları görsələr də, onlar özlərini görməməzliyə vurub, sanki bütün məsuliyyətdən boyun qaçırmaq düşüncəsində olurlar. Yəni, bu şöbə bir növ “qış yuxusu”nda olsa da, çox keçmədi ki, Bakı şəhər Dövlət Yol Polisi İdarəsinin rəisi, polis polkovniki cənab Rəşid Piriyevin verdiyi tapşırıq əsasında, Milli Qəhrəman Eldar Tağızadənin adını daşıyan küçə ilə, Süleyman Rüstəm küçəsinin kəsişməsində, hansı ki, məktəbli şagirdlərin daha çox gedib-gəldikləri piyada yolunda nəqliyyat vasitələrinin saxlanması qadağan olundu və bununla bağlı ciddi tədbirlər də görüldü. Bəli, bu yöndə atılan addımı çoxsaylı sakinlər görüb razılıqla qarşıladılar. Ona görə də peşəkar polis əməkdaşı olan Rəşid Piriyevi Bakı şəhər Dövlət Yol Polisi İdarəsinə rəis təyin etdiyi üçün, şəxsən çoxsaylı sakinlər adından ölkə rəhbəri İlham Əliyev cənablarına və daxili işlər naziri cənab Vilayət Eyvazova dərin təşəkkürümüzü bildiririk. Bu yöndə atılan addımlar bir daha onu sübut edir ki, polis polkovniki Rəşid Piriyev üzərinə düşən vəzifə borcunu layiqincə yerinə yetirən, baş verən hər cür problemi qısa zaman kəsiyində aradan qaldırmağa çalışan peşəkar rəhbər şəxsdir.
Nyus.Az
