Tanınmış psixoloq Gülnar Orucova mediaya verdiyi müsahibəsində deyib ki, fal və falçı əsrin bitməyən mövzularından biridir.
Psixoloq bildirib ki, falçıların çoxu eyni sözü deyirlər: ““Sənə göz dəyib, səndə nəzər, cadu var...” Falçıların çoxu, həqiqətən, şizofreniyadan əziyyət çəkən insanlardır. Sadəcə, qəribə adları var, özlərinə yeni adlar qoyurlar – ekstrasens, uzaqgörən... Əslində, keçmişin mollaları daha zərərsiz idi. Çünki molla bildiyi-bilmədiyi ayəni yazardı, insanlara ümid verərdi ki, hər şey yaxşı olacaq. Amma falçılar daha təhlükəlidir. Bunlar yüksək məbləğlər alırlar, nələrisə vəd verir, əminlik yaradırlar, amma ortada heç nə olmur. Falçıların danışdıqlarına baxın. Dönüb arxaya baxıram, biri deyir “mən demişdim, Türkiyədə zəlzələ olacaq”, o bir deyir “mən demişdim, müharibə olacaq”. Xarici televiziyalara pul verirlər, Rusiyada özlərini reklam edirlər, gəlib Azərbaycanda qəbullarını yüksək qiymətə qoyurlar. Qəbullardan pullar qazanırlar, özlərini reklam edirlər. Ən pisi isə televiziyalarımızın bu cahilliyi təqdim etməsidir. Sosial medianı kənara qoyuram, çünki sosial mediada fərdi insanlardır, baxış sayını çoxaltmaq üçün paylaşırlar. Amma televiziyanın bu cahilliyi təqdim etməsi, bu cür insanları təndiq etməməsi, icimai qınağa çəkməməsi doğru deyil. Televiziya əslində bunları etməlidir ki, insanların falçılara marağı azalsın. Bu gün falçı elə qiymət qoyur ki, yanına gələn adam bir neçə aylıq əmək haqqını ona verməlidir. İşi düzələcək, düzəlməyəcək, hələ bu da sual işarəsi altındadır. Falçılar deyirlər ki, gözümə filankəs göründü, mənə dedi ki, filan şeyi et... Özləri bilərəkdən, ya bilməyərəkdən bu iddiaları səsləndirirlər. Sonda isə çox faciəvi ölümlərlə, intiharlarla dünyadan köçürlər. Düşünürəm ki, belə şeyləri iddia edən insanlar özünü gözə soxmaq məqsədilə edirlər. Əslində, çağırış verir ki, məmurlar mənim yanıma gəlsinlər... İnsanlara tövsiyə edirəm ki, falçılara verdiyiniz pulu özünüzü inkişafa qoyun, özgüvəninizi artırın, kurslara qatılın, falçılara ehtiyac qalmayacaq. Bir şizofrendən ümid gözləməyin. Falçıların əksəriyyəti psixiatrik problemi olan insanlardır”.
Şirvan şəhərinin Çılpaqlı qəsəbəsində “Pürrəngi” Çay Evinin yanında taxta hasarlı evdə yaşayan ukraynalı Valya adlı qadın falçılıqla məşğuldur. Fala 30-50 manata baxır, cadunu isə 300-500 manata çıxarır. Deyilənə görə, sadəlövh və xurafata inanan insanları aldatmaqla pullarını mənimsəyən fəaliyyətini şəhər rəhbərliyi – İcra Hakimiyyətinin başçısı və polis idarəsinin rəisi dəstəkləyirlər. Qeyd olunur ki, Şirvanda korrupsiya girdabına bulaşmış az qala bütün yerli məmurlar Valyanın “həmişəbahar” müştəriləridirlər.
Hörmətli cənab başçı, hörmətli cənab rəis və digər şirvanlı məmurlar! Valyanın falına, cadu-pitiyinə, sizləri dövlətin antikorrupsiya tədbirlərindən qoruyacağına inanırsınızsa, bir ondan soruşun, desin görək, Rusiya – Ukrayna müharibəsi nə vaxt bitəcək və hansı tərəfin qələbəsi ilə?
Nyus.Az
