Məlumdur ki, hər dövlətdə təhsil sahəsinin inkişaf etdirilməsi, həmin dövlətin inkişaf konsepsiyasının tərkib hissəsindən biri hesab olunur. Belə bir səbəbdəndir ki, bugünə kimi Prezident İlham Əliyevin ölkəmizdə təhsil sahəsinin inkişaf etdirilməsi yöndə göstərdiyi diqqət və qayğı, dövlət siyasətinin əsas strateji istiqamətlərindən birini təşkil edir. Bəli, ölkəmizdə təhsilin inkişaf etdirilməsinə göstərilən qayğının nəticəsidir ki, hal-hazırda bu sahə keyfiyyətcə yeni inkişaf mərhələsinə qədəm qoymuşdur. Qeyd edək ki, 18 oktyabr 1991-ci ildə Azərbaycan Respublikası ikinci dəfə özünün müstəqil yaşamaq hüququnu bütün dünyaya bəyan edib “Konstitusiya aktı”nı qəbul etdikdən sonra, xalqımızın, dövlətimizin qarşısına yeni dövrün tələblərinə uyğun yeni vəzifələr qoyuldu. Belə bir səbəblər üzündən də hər sahədə olduğu kimi, təhsil sahəsində də müəyyən islahat proqramlarının həyata keçirilməsinə, lazımi addımların atılmasına ciddi ehtiyac duyuldu. Faktdır ki, xalqımızın ümummilli lideri, mərhum prezidentimiz Heydər Əliyev hakimiyyətdə olarkən, təhsil və onun problemlərinin həlli ilə bağlı məsələlərdə hər zaman açıq şəkildə mövqeyini ifadə edirdi. Məsələn, vaxtilə Ulu Öndər təhsillə aid yanaşmasını belə bir formada ifadə etmişdi: “Milli ideologiyamızı hər yerdə tətbiq etmək üçün məktəblərdə Azərbaycan xalqının tarixinin tədrisinə çox ciddi fikir vermək lazımdır. Gənclərimiz öz tarixini, öz tarixi keçmişini gərək yaxşı bilsinlər. Çünki mənəviyyatımız, gənclərin bugünkü və gələcək mənəviyyatı bununla bağlıdır”. Bir məsələni də qeyd etmək yerinə düşər ki, ümummilli lider Heydər Əliyev sovet Azərbaycanına rəhbərlik etdiyi illərdə ölkəmizdə beş yeni ali təhsil müəssisəsi açılmış və ali məktəblərdə təhsil alanların ümumi sayı təqribən 70 mindən 100 min nəfərə qədər artmışdır. Ulu Öndər keçmiş İttifaqın ən nüfuzlu təhsil müəssisələrində azərbaycanlıların oxumasına çalışmış və bu istiqamətdə lazımi addımlarını da atılmışdır. Belə bir halın varlığı, məhz respublikamızda milli kadr potensialının daha da artırılmasına geniş imkanlar yaratmışdır.
Ulu öndər Heydər Əliyev müstəqillik illərində də ölkəmizdə elm və təhsilin inkişafını diqqətdən kənarda qoymamış, o cümlədən elm-təhsil problemlərinə kompleks şəkildə yanaşmışdır. O, bu sahədə mövcud olan problemlərin aradan qaldırılması və dünyanın inkişaf etmiş ölkələrinin təcrübəsinə uyğun təhsil strategiyasının Azərbaycanda həyata keçirilməsi məqsədilə ciddi tədbirlər həyata keçirmiş və mühüm əhəmiyyət kəsb edən fərman və sərəncamlar imzalamışdır. Məsələn, 2002-ci il oktyabrın 4-də Ulu Öndərin imzaladığı “Azərbaycan Respublikasında ümumtəhsil məktəblərınin müvafiq texniki bazasının möhkəmləndirilməsi haqqında” Sərəncamı, məhz milli elm və təhsil sahəsinin inkişafında vacib amillərdən biri olaraq bu gün də qiymətləndirilməkdədir. Bu sərəncam ümumtəhsil məktəbləri şəbəkəsinin genişləndirilməsinə, maddi-texniki bazasının möhkəmləndirilməsinə etibarlı zəmin yaratmışdır. “Azərbaycan Respublikasında yeni ümumtəhsil məktəblərinin tikintisi, əsaslı təmiri və müasir tədris avadanlıqları ilə təmin olunmasına dair proqramın təsdiq edilməsi haqqında” Azərbaycan Respublikası Prezidentinin 17 fevral 2003-cü il tarixli sərəncamı da, ölkəmizdə bu sahədə yaranmış problemlərin aradan qaldırılması yöndə xüsusi əhəmiyyətə malik dövlət sənədi olmuşdur.
Bəli, fəxrlə qeyd edə bilərik ki, əsası ulu öndər Heydər Əliyev tərəfindən müəyyən olunmuş siyasətin nəticəsində bu gün respublikamızda təhsilin inkişafı, onun keyfiyyət göstəricilərinin müəyyən tələblərə cavab verməsi istiqamətində lazımi addımlar atılır və hal-hazırda da atılan addımlar öz bəhrəsini verməkdədir. Qeyd edək ki, bu gün Azərbaycan təhsilinin inkişafına dəyərli töhfələrini bəxş edən elə təhsil müəssisələri var ki, onların fəaliyyətlərini, Azərbaycan təhsilinin inkişaf etdirilməsi yöndə verdiyi töhfələrin əhəmiyyətıni heç zaman unutmaq olmaz. Belə təhsi ocaqlarından biri də, Bakı şəhəri, Nəsimi rayonu ərazisində fəaliyyət göstərən 164 saylı tam orta məktəbdir və bu təhsil müəssisəsi 1938-ci ildən fəaliyyət göstərir. 2008-ci ildə Təhsil Nazirliyi tərəfindən bu məktəb üçün əlavə 600 yerlik tədris korpusu inşa olunur və əlverişli imkanlar da yaradılır. Bu təhsil müəssisəsində çalışan pedaqoji kollektiv üzvlərindən hər birinin fəaliyyətində “Bu günün yüksək təhsili sabahın parlaq gələcəyi inkişafın qarantıdır” devizi əsas götürülür. Belə bir səbəbdəndir ki, 2010-cu ildə 164 saylı tam orta məktəb möhtərəm Prezident İlham Əliyevin Sərəncamı ilə, “Ən yaxşı məktəb” müsabiqəsinin qalibi olur və pedaqoji kollektivin 11 üzvü “Ən yaxşı müəllim” müsabiqəsinin qalibi adına layiq də görülür.
Bəli, bu gün də məktəbin fəaliyyətində başlıca istiqamət, bütün fənn dərsliklərinin keyfiyyətli tədrisdir və tədris prosesi zamanı hər şagirdin yüksək səviyyəli bilik və bacarıq əldə etmələrinə lazımi imkanlar yaradılır. Məktəbdə dərslər azərbaycan və rus dillərində tədris olunur və bu təhsil ocağı bir çox layihələrdə yaxından iştirak edir. Tədris prosesində elektron vasitələrdən istifadə olunma da, şagirdlərdə təhsilə olan marağı daha da artırır və onların öyrəndikləri dərsləri daha yaxşı yadda saxlamalarına kömək edir. Bundan əlavə, məktəbin şagirdləri rayon, şəhər və respublika üzrə keçirilən müsabiqələrdə daim iştirak edir və onlar həmin müsabiqələrdə lazımi nailiyyətlər də əldə edirlər. Onu da bildirək ki, adı çəkilən bu təhsil müəssisəsində çalışan bir çox müəllimlərin, o cümlədən 2B sinif müəlliməsi Sevinc xanımın da fəaliyyəti istər rəhbərlik tərəfindən, istərsə də valideyinlər tərəfindən hər zaman yüksək qiymətləndirilir.
Qeyd edək ki, 164 saylı tam orta məktəbinin adı, bu təhsil ocağında çalışan və zəngin potensiala, lazımi göstəricilərə və s. malik olam müəllimlərin, ələlxüsus Sevinc müəllimənin sayəsində Bakı şəhərindəki məktəblər sırasında daha öndə çəkilir. Bəli, hər kəsə məlumdur ki, Sevinc xanım dərin elmi savada, yüksək insani keyfiyyətə, lazımi təcrübəyə malik ziyalı olduğundan, bu gün o, müəllim və şagird kollektivinin, əksər valideyinlərin sevimlisinə çevrilib. Uzun illərdir ki, təhsil sahəsində çalışan və işgüzar fəaliyyəti ilə bu sahədə xüsusi ad-san çıxaran Sevinc müəllimə, bu gün də yorulmaq bilmədən çalışır. Faktdır ki, 164 saylı tam orta məktəbdə müxtəlif fənn ixtisasları üzrə dərsliklərin tədrisi, müəllim-şagird davamiyyətin günün tələblərinə cavab verməsi, şagirdlərə hərbi vətənpərvərlik əhvali-ruhiyyəsinin aşılanması, kollektiv üzvləri arasında sağlam mühitin formalaşması, hər kəsin fikrinə, düşüncə tərzinə hörmətlə yanaşma və s. kimi amillərin varlığı, kollektiv üzvlərinin hər birinə, o cümlədən Sevinc müəlliməyə də iş fəaliyyətini uğurla davam etdirməyə imkan verir. İnanırıq ki, Sevinc xanımın işgüzar fəaliyyəti, daşıdığı vəzifəsinin məsuliyyətini lazımınca dərk etməsi, gənc nəslin təlim-tərbiyyəsində, sağlam ruhda böyümələrində, Vətən üçün layiqli övlad olmalarında mümkün imkanlarından bacarıqla istifadə etməsi, bundan sonra da onun adının və fəaliyyətinin daha çox məşhur olmasına səbəb olacaq.
Bütün bunlar onu söyləməyə əsas verir ki, Sevinc müəllimənin başlıca amalı bağlı olduğu xalqına, doğma vətəninə layiqincə xidmət etməkdir, gələcəyimiz hesab etdiyimiz gənclərin sağlam ruhda böyümələrinə çalışmaqdır, onların elmə-təhsilə yiyələnmələri üçün mümkün imkanlarından bacarıqla istifadə etməkdir. Bəli, bugünkü təhsilimizin inkişaf etdirilməsində Sevinc xanımın və onun kimi peşəkar, savadlı, bacarıqlı, xalqını sevən, dövlətinə bağlı olan ziyalılarımızın üzərinə çox böyük məsuliyyət yükü düşür. Hər kəs tam şəkildə əmin ola bilər ki, indiyə kimi şərəfli Azərbaycan ziyalısı adını daşımış Sevinc xanım, ona göstərilən etimadın məsuliyyətini daha dərindən dərk edib, bundan sonra da gənc nəslin təlim-tərbiyyəsində, gələcək həyata hazırlanmalarında lazımi imkanlarından bacarıqla istifadə edəcək. Bütün bunlar gəlişi xoş sözlər deyil, əsl həqiqətlərdir.
Bizimxəbər qəzeti.
