ABŞ prezidenti Donald Tramp Rusiya-Ukrayna müharibəsinin başlanması və sülh danışıqları ilə bağlı növbəti dəfə diqqətçəkən bəyanatlar verib.
Tramp CBS telekanalının məşhur “60 Minutes” verilişinə müsahibəsində Rusiya prezidenti Vladimir Putinlə Ukrayna lideri Volodimir Zelenski arasında keçirilən ilk görüşdə Ukrayna tərəfinin Rusiyaya qarşı böyük hörmətsizlik nümayiş etdirdiyini iddia edib. O, bu səbəbdən liderlərin şəxsi münasibətləri barədə danışmaq istəmədiyini bildirib.
ABŞ lideri vurğulayıb ki, onun ilk prezidentlik dövründə müharibə baş verməyib və hakimiyyətdə qalsaydı, Putinin ən böyük arzusu olmasına baxmayaraq, Rusiyanın Ukraynaya qarşı müharibəyə başlamasına imkan verməzdi.
Tramp müharibədən sonra Ukraynanın sərhədlərinin əvvəlkindən fərqli olacağını, ölkənin ərazi itkisi ilə üzləşə biləcəyini də istisna etməyib. O, həm Putin, həm də Zelenski ilə münasibətlərinin yaxşı olduğunu bildirərək, Vaşinqtonun müharibəni tezliklə dayandırmaq və tərəfləri yekun sülh sazişinə gətirmək niyyətində olduğunu vurğulayıb.
Trampın Ukraynanın müharibədən sonra ərazi itkiləri ilə üzləşəcəyinə dair eyhamı Vaşinqtonun Kiyevə münasibətdə mövqeyinin dəyişdiyini göstərirmi? Bu, faktiki olaraq Rusiyanın işğal etdiyi ərazilərlə bağlı güzəştə hazırlıq kimi qiymətləndirilə bilərmi?
Mövzu ilə bağlı siyasi şərhçi Heydər Oğuz Musavat.com-a danışıb.
Siyasi şərhçi bildirib ki, ABŞ prezidenti Donald Trampın Ukrayna-Rusiya müharibəsi ilə bağlı mövqeyi dəyişməyib:
“O, hələ ikinci dəfə prezidentliyə namizədliyini irəli sürəndə belə, Ukraynanın ərazi güzəştləri hesabına müharibənin dayandırıla biləcəyini düşünürdü. Məhz bu səbəbdən də Ukrayna-Rusiya müharibəsindəki gərginliyi bir gündə həll edəcəyinə dair populist bəyanatlar verirdi. Hətta Zelenski ilə qalmaqallı görüşü də məhz bu mövqeyindən qaynaqlanmışdı. Xatırladım ki, həmin görüşdə Ukrayna prezidentinin problemin ədalətli həlli ilə bağlı tələbinə “Sizin əlinizdə kart yoxdur”, - deyə qeyri-adi cavab vermişdi. Trampın nöqteyi-nəzərincə, müharibənin həlli yolları axtarılarkən kimin haqlı, kimin haqsız olduğuna baxmaq lazım deyil. Kim güclüdürsə, müharibəni bitirmək üçün kartlar onun əlindədir. Bu yanaşmanı Zelenskinin qəbul etmək imkanı yox idi. Çünki bu halda Ukraynanın ərazi bütövlüyü və suverenlik hüquqları gözardı edilir, “kim güclüdürsə, o da haqlıdır” düşüncəsi əsas götürülürdü. Halbuki, müharibələr tarixində dəfələrlə “kim haqlıdırsa, o qalib gələcək” prinsipi öz sözünü demişdi. Artıq beş ildir dünyanın ikinci ən böyük hərbi gücü ilə ölüm-dirim mübarizəsi aparan Ukrayna Qərb dövlətlərinin siyasi və logistik dəstəyi ilə Rusiyanı çarəsiz vəziyyətə salıb. Kiyevin Rusiya iqtisadiyyatının aparıcı sektorlarına endirdiyi zərbələr Moskvanı iflasa sürükləyir. Belə bir vəziyyətdə Trampın “güclü haqlıdır” məntiqi də çökür, Ukraynanı və onun Qərb müttəfiqlərini müharibəni davam etdirməyə həvəsləndirir. Açığı, ABŞ-də keçirilən Konqres seçkilərində böyük uğursuzluqla üzləşən və “topal ördəyə” çevrilməsinə sayılı günlər qalan Tramp artıq kimlərisə zor gücünə təslimiyyət aktı imzalamağa vadar edə bilməz. Uzağı, onun ədalətsiz tələblərinə “baş üstə” deyib, öz bildiklərini həyata keçirəcəklər. Nəticədə Tramp öz impiçmentini tezləşdirməkdən başqa heç nəyə nail ola bilməyəcək”.
Xalidə Gəray
Musavat.com
