Abşeron rayonu, Diqah qəsəbəsində yerləşən Diqah Marketin ön hissəsində dəmir konstruksiyalardan istifadə edilməklə aparılan artırma işləri ilə bağlı redaksiyamıza foto və videogörüntülər daxil olub.
Təqdim olunan materiallar əsasında Mediatvaz.com xəbər portalı tərəfindən Abşeron Rayon İcra Hakimiyyətinə rəsmi jurnalist sorğusu ünvanlanaraq tikintinin qanuniliyinə, müvafiq icazələrin mövcudluğuna və şəhərsalma normalarına əməl olunub-olunmadığına aydınlıq gətirilməsi xahiş edilib.Abşeron Rayon İcra Hakimiyyətinin redaksiyamıza təqdim etdiyi rəsmi cavab isə diqqətçəkən məqamları üzə çıxarıb. Cavabda bildirilir ki, əməkdaşlar tərəfindən aparılan monitorinq zamanı vətəndaş Məmmədova Gülbəniz Zirəddin qızı tərəfindən heç bir icazə sənədi olmadan, qeyri-qanuni şəkildə dəmir konstruksiyalardan istifadə edilməklə artırma işlərinin aparıldığı aşkarlanıb.
Hətta qeyd olunur ki, qanunvericilikdə nəzərdə tutulmuş tədbirlərin görülməsi üçün aidiyyəti qurumlara məlumat verilib.Lakin ortaya çox ciddi sual çıxır: Əgər tikinti rəsmi şəkildə qanunsuz hesab olunursa, bəs həmin obyektdə işlər niyə bu gün də fasiləsiz davam edir? Belə görünür ki, bir tərəfdən dövlət qurumları qanunsuzluğu etiraf edir, digər tərəfdən isə həmin qanunsuzluğun qarşısını almaq üçün heç bir real tədbir görülmür. Bu isə dövlət nəzarətinin effektivliyi ilə bağlı ciddi şübhələr yaradır.
Bəs Fövqəladə Hallar Nazirliyi, Şəhərsalma və Arxitektura Komitəsi, Əmlak Məsələləri Dövlət Xidməti və digər aidiyyəti qurumlar hara baxır? Qanunsuz tikinti barədə rəsmi məlumat olduğu halda niyə tikinti dayandırılmır? Kim və ya hansı maraqlar bu qanunsuzluğun davam etməsinə şərait yaradır? Azərbaycan Respublikası Prezidentinin 2012-ci il 6 iyun tarixli 648 nömrəli Fərmanı ilə təsdiq edilmiş "Yerli icra hakimiyyətləri haqqında" Əsasnamənin 4.16-cı bəndinə, eləcə də Prezidentin 24 noyabr 2014-cü il tarixli 375 nömrəli Fərmanı ilə təsdiq edilmiş "Dövlət şəhərsalma nəzarətinin həyata keçirilməsi Qaydaları"na əsasən, yerli icra hakimiyyətləri öz ərazilərində mütəmadi monitorinqlər aparmalı, qanunsuz tikintilərin qarşısını almalı və hüquqi tədbirlər görməlidirlər. Əgər qanunsuz tikinti aşkarlanıbsa, onun davam etməsi artıq sadəcə sahibkarın məsuliyyəti deyil, həm də nəzarət funksiyasını həyata keçirməli olan qurumların fəaliyyətinə ciddi suallar yaradır.
Abşeron Rayon İcra Hakimiyyətinin başçısı Abdin Fərzəliyev bu məsələyə aydınlıq gətirməlidir. Rayon rəhbərliyinin verdiyi rəsmi cavabla faktiki vəziyyət niyə üst-üstə düşmür?
Əgər qanunsuz tikinti dayandırılmayıbsa, deməli ya verilən cavab formal xarakter daşıyır, ya da rayon ərazisində qəbul olunan qərarların icrasına nəzarət yoxdur. Qanunun aliliyi yalnız kağız üzərində yazılan cavablarla təmin edilmir. Dövlət orqanlarının əsas vəzifəsi qanunsuzluğu etiraf etmək deyil, onun qarşısını operativ şəkildə almaqdır. Əks halda belə hallar cəmiyyətdə "qanunsuz tik, sonra baxarıq" düşüncəsini formalaşdırır ki, bu da dövlət nəzarəti və hüququn aliliyi prinsiplərinə ciddi zərbə vurur.
Mövzunu diqqətdə saxlayacaq və aidiyyəti qurumların atacağı real addımları izləməyə davam edəcək.
Nyus.Az
