İmtahanlara az vaxt qaldıqda məktəblilərin bütün mövzuları yenidən sıfırdan öyrənməyə çalışması əvəzinə, mövcud biliklərini möhkəmləndirməsi və özlərini mənəvi cəhətdən hazırlaması daha məqsədəuyğun hesab olunur.
Nyus.Az xəbər verir ki, bu barədə pedaqoq-psixoloq Natalya Morozova danışıb.
Mütəxəssis qeyd edir ki, imtahandan bir gün əvvəl əsas hazırlıq prosesi artıq tamamlanmış olmalıdır. Bu mərhələdə yeni məlumatlar mənimsəməyə çalışmaq yerinə, vacib mövzuların, düsturların və qaydaların qısa şəkildə təkrarlanması daha səmərəli nəticə verir.
Onun fikrincə, məlumatların daha yaxşı yadda qalması üçün qısa qeydlərdən, cədvəllərdən və sxemlərdən istifadə etmək faydalıdır. Belə üsullar mövzular arasındakı əlaqələri aydın görməyə və lazım olan informasiyanı imtahan zamanı daha tez xatırlamağa kömək edir.
Psixoloq istirahətin də hazırlığın ayrılmaz hissəsi olduğunu vurğulayır. Fasilələr beynin yüklənməsinin qarşısını alır, diqqəti artırır və gərginliyi azaldır. Buna görə də gəzinti və yüngül idman kimi aktiv fəaliyyətləri kitab oxumaq, musiqi dinləmək və yaxınlarla söhbət etmək kimi sakit məşğuliyyətlərlə əvəzləmək tövsiyə olunur.
Morozova kifayət qədər yuxunun əhəmiyyətini də xüsusi qeyd edib. O bildirib ki, hazırlıq dövründə hər gün 7-8 saat yatmaq və mümkün qədər eyni vaxtda yatıb oyanmaq vacibdir. Çünki yuxu çatışmazlığı diqqətin zəifləməsinə, yaddaşın pisləşməsinə və ümumi performansın aşağı düşməsinə səbəb ola bilər.
Ekspert yatmazdan təxminən 30 dəqiqə əvvəl telefon, planşet və kompüterdən uzaq durmağı məsləhət görür. Bunun əvəzinə kitab və ya jurnal oxumaq, həmçinin bitki çayı içmək və nəfəs məşqləri etmək rahatlamağa kömək edə bilər.
Həyəcanı azaltmaq üçün tövsiyə olunan üsullardan biri də müsbət nəticəni təsəvvür etməkdir. Psixoloqun sözlərinə görə, insan yatmazdan əvvəl imtahanın uğurla keçdiyini, suallara rahat və inamla cavab verdiyini, yüksək nəticə əldə etdiyini xəyal etdikdə özünəinamı artır və narahatlığı azalır.(Milli.az)
Nyus.Az
