[/center]Gəncəyə icra başçısı getmək yolunda olan Elnur Rzayev isə özünə Qasım Muradov kalibrli düşmən qazanmaq istəmir
Xaçmaz – Xudat yolunun Mürşüdoba kəndi ərazisinə düşən nahiyəsində, Alpançay sahilində meşə fondi torpağında ağacların məhv edilməsi ilə müşayiət olunan böyük istirahət mərkəzi salınır. Hələ bir müddət əvvəl həmin inşa işi qanunsu olduğu üçün dayandırılmışdı. O vaxt xəbər sızmışdı ki, obyekti "Aysberq” pivə istehsalı müəssisəsinin təsisçisi Qasım Muradov Xaçmaz Rayon İcra Hakimiyyətinin başçısının müavini Bəxtiyar müəllimlə şərikli inşa etdirirlər.
Hazırda davam etdirilən bu qanunsuz inşa işlərinə 5 saylı Regionun Meşə Təsərrüfatı Mərkəzinin rəisi Elvin Baxışovun münasibətini öyrənmək məqsədilə oinunla telefon əlaqəsi saxladıq. O, bildirdi ki, Nazirliyin göstərişi var.
ETSN yanında Meşələrin İnkişafı Xidmətinin rəisi Ramik Əşrəfov da nəzarətsizliyə görə məsuliyyəti hər vəchlə boynundan atmağa çalışır. Deyir ki, “ola bilsin, ərazi meşə fonduna aid deyil, biz o sahibkarı dəvət etmişik ki, gəlib bir yerdə baxış keçirək, amma o gəlmir”.
Məlum olduğu kimi, Azərbaycan Respublikası Prezidentinin 10 fevral 2026-cı il tarixli Sərəncamı ilə Rəşad İsmayılov Azərbaycan Respublikası ekologiya və təbii sərvətlər naziri vəzifəsinə təyin edilmişdir. Onun sələfi, sabiq nazir Muxtar Babayevin ETSN-ə rəhbərlik etdiyi dönəmdə də neqativ hallar müşahidə olunsa da, meşə ərazilərinin böyük miqyaslarla zəbt edilməsinə yol verilmir, hətta yüksək mənsəbli məmurlara belə bu məsələlərdə xüsusi imtiyaz tanınmırdı. Hətta yadda qalıb ki, 2021-ci ildə Milli Məclisin deputatı Eldəniz Səlimovun atası Adil Səlimov Xaçmazın Fərzəlioba kəndində ağacları qırdırdığına və 33 min manat ziyan vurduğuna görə prokurorluğa şikayət edilmişdi.
Ölçüyəgəlməz dərəcədə nəhəng kapitala malik Qasım Muradovun haqqında dolaşan informasiyalardan biri də bu idi ki, o, rəhmətlik Şəmsəddin Xanbabayev 2019-cu ildə Xaçmaz RİH başçısı vəzifəsindən azad olunduqdan sonra rayonun birinci kreslosunu ələ keçirmək üçün cəhdlər etmiş, bundan ötrü bütün əlaqələrini işə salmış, 2019-cu ilin oktyabr ayında bu niyyətini həyata keçirməyə çox yaxın olmuşdur. Lakin sövdələşib razılaşmış olduğu Ramiz Mehdiyev oktyabrın 23-də Prezident Administrasiyasının rəhbəri postundan ayrıldığına görə Qasım Muradov məqsədinə çata bilməmiş, oktyabrın 31-də dövlət başçısının sərəncamı ilə Elnur Rzayev rayona rəhbər vəzifəyə təyin olunmuşdu.
Lakin çox təəssüf ki, nədənsə rayonda meşələrin aqibəti Xaçmaz RİH-nin başçısı Elnur Rzayevi də qayğılandırmır. Ola bilsin ki, Qasım Muradovun gözqamaşdıran sərvəti rayon rəhbərinin də baxış bucağını dəyişdirib. Etibarlı mənbələrdən alınan digər məlumata görə isə, Elnur Rzayev Gəncə şəhər İcra Hakimiyyətinə başçı nvəzifəsinə təyinat almaq üçün xəlvət çabalarda bulunmaqdadır. O üzdən, ehtimal ki, bu ərəfələrdə özünə Qasım Muradov kalibrində düşmən qazanmaq istəmir.
Mövzuya qayıdacağıq.
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
