Son günlər ümumən respublika ərazisinə düşən normadan artıq yağıntı miqdarı yerli icra hakimiyyətlərinin, inzibati ərazi vahidlərində nümayəndəliklərin, bələdiyyələrin və digər aidiyyəti qurumların belə fors-major hallara hazır olmadıqlarını bir daha göstərdi.
Ciddi fəsadların yarandığı ərazilərdən biri də Abşeron rayonunun Masazır qəsəbəsidir. Qəsəbənin küçələrini basmış, onsuz da bərbad vəziyyətdə olan kanalizasiya xəttinin sıradan çıxması nəticəsində çirkab suyu fərdi yaşayış evlərınin və qeyri-yaşayış obyektlərinin kandarından içəri dolmuşdur.
Sakinlərindən Mustafayev Məhəmməd Əhməd oğlu 2006-cı ildən qəsəbənin Qarabağ küçəsində məskunlaşıb. Deyir ki, yaranmış acınacaqlı vəziyyətlə bağlı üz tutduqları səlahiyyətli orqanların – Abşeron rayon İcra Hakimiyyətinin, İ”Azərsu” ASC-nin Abşeron Sukanal İdarəsinin nümayəndələri sakinlərə hər gün yalançı vədlər verirlər: “Bir saata, iki saata məşğul olacağıq deyib yola salırlar. Halbuki, problem bir-iki saata həll olunası deyil. Cənab Prezidentin müvafiq sərəncamı ilə Masazır qəsəbəsində kanalizasiya şəbəkəsinin təkmilləşdirilməsi layihəsi təsdiqlənib. Di gəl, həmin layihə üzrə işlər həyata keçirilmir, iki il əvvəl dayandırılıb. Suyu çəkmək üçün cəlb olunan nasosları düzgün quraşdırmağa qabiliyyəti çatan mütəxəssislər də çatışmır”.
Digər bir sakin Zülfiyyə xanım deyir ki, vaxtlı-vaxtında su pulu, kanalizasiya pulu, sair kommunal xidmət haqqlarını ödəyirlər, haqq ödənməyəndə gəlib abonentin təminatını kəsirlər, lakin belə çətin vəziyyət yarananda aidiyyəti qurumlar öz vəzifələrini yerinə yetirmirlər: “Çirkab suların çəkilməsi ləngisə, müxtəlif təhlükəli xəstəliklər, üfunət yayan zərərli həşəratlar, gəmiricilər hər tərəfə yayılacaq. Üç gündür mən Fövqəladə Hallar Nazirliyinə zəng vururam, robot qız səsi ilə cavab verir ki, bütün xətlər məşğuldur. Mən bu qəsəbədə yaşamağıma görə xəcalət çəkirəm...”
Sakinlər həmçinin bildirirlər ki, Abşeron RİH-nin mənsubları onlara FHN-nin əraziyə nəzarət edən vəzifəli şəxslərini tapa bilmədiklərini deyiblər.
Bu məsələlər yerli infrastrukturun zəifliyi və qəsəbənin sürətli inkişafı fonunda kanalizasiya şəbəkəsinin yenidən qurulmasının vacibliyini göstərir.
Nisa Şirvanlı.
Nyus.Az
