"Hörmətli cənab Rövşən Nəcəf. Mən, SOCAR ailəsinin bir üzvü kimi uzun illərdir bu sahədə əmək sərf edən bir əməkdaşınızam. SOCAR Baş Ofisinin kadrlar şöbəsinə müraciət etmək istəmirəm, çünki onlar müraciətlərə ümumiyyətlə baxmaq istəmirlər..." "DİA-AZ" xəbər verir ki, bunu özünün etiraz dolu müraciətində SOCAR işçisi Rac Kərimov qeyd edib.
O daha sonra fikrini belə davam etdirir: "Özü də kimin müraciətinə - üstü başı mazutlu bir fəhlənin.
Ona görə də SOCAR prezidenti kimi sizə müraciət edirəm. Şəxsi dərəcəmlə bağlı hər hansı bir çətinliyim olmasa da, uzun illər çiyin-çiyinə, bir ailə kimi çalışdığım iş yoldaşlarımın qarşılaşdığı və hər birimizi dərindən üzən bir məsələni sizinlə bölüşməyi özümə mənəvi borc bilirəm.
Məlum olduğu kimi, ötən illər ərzində 4-cü dərəcəli operator vəzifəsində çalışan bir çox təcrübəli həmkarımız 5-ci dərəcəyə yüksəlmək məqsədilə şirkətimizin təşkil etdiyi təlimlərə cəlb olunmuşdular. Bu insanlar böyük həvəslə kursları bitirmiş, imtahanları uğurla verərək sertifikatlarını əldə etmişdilər. Lakin sonradan tətbiq edilən "mütləq diplom" tələbi, illərini bu peşəyə vermiş, sahənin bütün çətinliklərinə bələd olan fədakar insanların yolunda gözlənilməz bir maneəyə çevrilmişdir.
İllərdir yan-yana çalışdığım bu insanların peşəkarlığına və işinə olan bağlılığına şahidlik edən bir həmkar kimi bildirmək istəyirəm ki, onların qazandığı on illərlə ölçülən təcrübə hər birimiz üçün çox dəyərlidir. Təlimlərdə göstərdikləri uğur onların həm də nəzəri cəhətdən hazır olduqlarını sübut etmişdi. İndi isə yalnız formal sənəd çatışmazlığı səbəbindən onların dərəcə artımının dayandırılması kollektivdə böyük bir məyusluq yaradır.
Sizdən böyük hörmətlə xahiş edirik ki, təlimi uğurla bitirmiş və illərini bu sahəyə qurban vermiş təcrübəli operatorlar üçün daxili qaydalarda bir güzəşt nəzərdə tutulsun. Necə ki bəzi idarələrdə o güzəştlər olundu. Onların sertifikatları və çoxillik qüsursuz xidmətləri nəzərə alınaraq dərəcələrinin artırılması, həm işçilərin şirkətə olan bağlılığını artırar, həm də ədalət hissini bərpa edərdi. İnanırıq ki, SOCAR rəhbərliyi illərini bu sənayeyə həsr etmiş insanların əməyini hər zaman yüksək qiymətləndirəcəkdir..."
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
