Abşeron rayonunun Heydər Əliyev prospektində yaşayan vətəndaş Məhbarə Aşurova qonşuluqda aparılan qanunsuz tikinti ilə bağlı ciddi narahatlığını ifadə edir. Şikayətçinin sözlərinə görə, tikinti işləri heç bir tikinti normalarına əməl olunmadan və ara məsafəsi saxlanılmadan aparılır ki, bu da ətrafda yaşayan insanların həyatını təhlükə altına salır.Məhbarə Aşurova bildirir ki, sözügedən ərazi əvvəllər əkin sahəsi olub. Lakin son dövrlər həmin sahədə sürətlə və heç bir rəsmi qaydalara əməl edilmədən tikinti işləri aparılır. Onun sözlərinə görə, aparılan qazıntı və tikinti işləri nəticəsində yaşadıqları evin bünövrəsi zəifləyir və evdə çatlar yaranmağa başlayır. Şikayətçi iddia edir ki, tikinti işləri heç bir qanuni icazə olmadan həyata keçirilir və buna baxmayaraq prosesə göz yumulur.Bu tikinti ilə bağlı şikayəti ictimailəşdirildikdən sonra məsələ ilə bağlı Abşeron Rayon İcra Hakimiyyəti də münasibət bildirib. Qurumdan verilən rəsmi açıqlamada qeyd olunur ki, məsələ ilə bağlı araşdırma aparılması üçün Abşeron Rayon İcra Hakimiyyətinin Memarlıq və Tikinti sektoruna, həmçinin RİH başçısının Xırdalan şəhər inzibati ərazi dairəsi üzrə nümayəndəliyinə müvafiq tapşırıqlar verilib.Açıqlamada bildirilib ki, məsələnin qanunamüvafiq şəkildə araşdırılması və nəticələrinə uyğun olaraq zəruri tədbirlər görüləcək. Lakin ortaya ciddi suallar çıxır. Əgər ərazidə tikinti işləri uzun müddətdir aparılırsa və tikinti normaları kobud şəkildə pozulursa, niyə bu günə qədər buna nəzarət olunmayıb? Maraqlıdır ki, vətəndaş həyətində kiçik bir tikili – məsələn, toyuq hini belə tikmək istəyəndə icra hakimiyyətinin nümayəndələri dərhal bundan xəbər tutur və tikintinin dayandırılmasını tələb edir. Bəs necə olur ki, iri həcmli tikinti işləri aparılır, torpaq qazılır, ara məsafələri pozulur, amma bu prosesdən məsul qurumların xəbəri olmur? İddialara görə, belə qanunsuz tikintilərə Abşeron Rayon İcra Hakimiyyətinin Memarlıq və Tikinti şöbəsinin müdir müavini Kənan Babayev tərəfindən qeyri-rəsmi şəkildə “icazə” verilir. Əgər bu iddialar doğrudursa, bu artıq təkcə qanunsuz tikinti deyil, həm də dövlət qurumlarında ciddi nəzarət boşluğunun göstəricisi hesab edilə bilər. Maraqlı məqam isə odur ki, belə açıq-aşkar qanunsuz tikinti işləri aparıldığı halda digər aidiyyəti qurumlar – Fövqəladə Hallar Nazirliyi, Dövlət Şəhərsalma və Arxitektura Komitəsi, eləcə də İqtisadiyyat Nazirliyi yanında Əmlak Məsələləri Dövlət Xidməti bu məsələyə niyə reaksiya vermir? Tikinti norma və qaydalarına görə yaşayış evləri arasında müəyyən olunmuş məsafə saxlanılmalı, torpağın təyinatı dəyişdirilmədən tikinti aparılmamalıdır. Əks halda bu cür tikintilər həm qanun pozuntusu sayılır, həm də insanların həyat və sağlamlığı üçün real təhlükə yaradır.Sual yaranır: Abşeronda qanunsuz tikinti aparan şəxslər kimə arxalanır? Niyə vətəndaşın şikayəti və təhlükəsizlik problemi aidiyyəti qurumlar tərəfindən araşdırılmır? Məsələ ilə bağlı qarşı tərəfin və aidiyyəti dövlət qurumlarının mövqeyini dərc etməyə hazırıq. Ümid edirik ki, məsələ tezliklə araşdırılacaq və qanunsuz tikinti ilə bağlı qanun çərçivəsində tədbir görüləcək.
Nyus.Az
